A thlawnin mi 2000 chuang en
Indian Medical Association (IMA), Mizoram Government Doctors’ Association (MGDA) leh Indian Dental Association (IDA) tangho buatsaihin Ningani khan Hnahlan Primary Health Centre leh Hnahlan Higher Secondary School-ah special clinics neih a ni.
A hawnna inkhawmah Health & Family Welfare Board vice chairman Dr ZR Thiamsanga, Champhai North bialtu MLA chuan a bial chhung Hnahlan khua leh a chhehvel tan special clinic liantham tak, mipui hriselna kawnga pawimawh leh remchang buatsaih a ni chu lawmawm a tih thu a sawi.
IMA, MGDA leh IDA hian hetiang special clinic hi tum 8 an buatsaihna a ni a. Mizoram hmun kilkhawr zawkahte neih zel an tum tih a sawi. Damdawi in tha leh thawktu thiam tak takte mipui tana sawn hnaih a nihnaah, sum leh pai bakah hun leh tha sengtute hnenah lawmthu a sawi a ni.
Special clinic-ah hian doctor specialist leh super specialist 38, supporting staff 8 leh driver 6 an tel a. Team member-te hi sawrkar, mimal leh private hospital-a thawktute atanga kalkhawm an ni. A thlawna inentir a nih bakah damdawi engemawzat a thlawna sem niin, damdawi sem tur lei nan hian Dr ZR Thiamsanga hian Rs.1,50,000 a tum bakah mi inphalten an thawh bawk.
Taksa peng hrang hrang leh kawchhung lam en theihin an inchhawp a. Damlo bakah mahni hriselna thlithlaia inentir mi 2000 chuang an awm. Ha phawi sak, intra articular injection pek leh inzai tenau tih sak nghal an awm bawk.
Hnahlan leh khaw dang 15 bakah thenawm ram Myanmar khaw 3 atangte in pantu an awm a ni.
A thlawnin mi 2000 chuang en
Get real time updates directly on you device, subscribe now.
Prev Post