A thusawi tur chiang hmasa thin turin chief minister chah

Rin thu chhakchhuak mai loa, a thusawi tur hrechiang hmasa thin turin chief minister Lalduhoma an chah tih BJP Thalai chuan an sawi.
BJP Mizoram Thalai Hqrs. thuchhuak chuan, tunhnaia interview-naah chief minister hian, Mizorama sum van chhanah a mawhphurhna la ngam loin puhmawh tur dang dap a. India rama GST tlakhniam vang, tia a sawi chu zahthlak hle ah an ngai tih a sawi.
‘India ram GST hi July thleng khan cheng vaibelchhe nuai 2.11 a ni a, net revenue hi kum hmasa aiin zaa 15.8 in a pung a, thla 14 chhunga growth rate that ber lai a ni. GDP pawh
quarter-1 financial year 27-ah zaa 7.8-in a pung bawk. Mizoram CM hian a thusawi tur hrechiang hmasa thin se, a rin thu chhak chhuak mai mai tawh lo turin kan ngen a ni,’ a ti.
Mizoram CM a ni tih inhria se, a thusawi vawi khat pawimawh zia, opposition ang maia a la inngai emaw tih tura a khawsa fo pawh a zahthlak takzet tih a sawi a. Mizoram pa a nih inhria in, pa dinhmun pawimawh zia hria a, thil tak tak ngaihtuah turin an chah tih a sawi bawk.
Mizoram-a sawrkar hmasaten tax an lak ve ngai loh, tun sawrkarin mipui atanga chhiah tam tak an lak hnuah an hmanna mumal mipui hriat theiha puanzar mumal an nei lo leh, a bikin petrol leh diesel-a cess an lak pawh kawng siamna tur anga sawi si a, kawngpui siam that loh tam tak awm leh, district hrang hrang inkalpawhna kawng chhe ta lutuk chu mak an tih thu BJP Thalai hian sawiin, ‘Sawrkar hmasate aia tha tura inzuar, sawrkar hmasate aia chhe zawk maha sawrkarna an kalpui hian mipui thinlung an ti na hle a, thil tha zawk beisei a, ZPM sawrkar nghakhleltute ngei pawh beidawngin an awm leh ta hmuh hian rilru a ti na takzet,’ a ti.