CHIEF MINISTER INTI LAL LO!

Zobiakvela(Masena)

Mizo te’n Chief Minister leh Minister, MLA te hi “Inti lal tak leh chungnung chungchuang” anga kan ngaih thin dan fel lo a awm a! Tin, tawngkam fuh tâwk lo kan hman pawh a awm. “Thlan lal” kan ti teh tlat a! “Lal” (King & Queen) ni tura kan thlan a ni lo tih kan hriat fuh a pawimawh. “Kan aiawha roreltu leh Dan siamtu tur” (legislator) te an ni.
“Sorkar” tih chu “Mipui” tihna a ni mai a. Nimahsela, tunhma lam atanga rual û zawk te’n an sawi dan a dik loh laklawh avangin, “Mahni thu chauh hmanga roreltu” (Dictator) emaw kan ti a nih loh pawhin chutiang tiat chuan kan hmu tlat thin. Anmahni-ah hian kan tel ve (participate) a ni tih kan theihnghilh loh a pawimawh bawk. Mipui laka han inlawkleu vel tur leh induh viau tur an ni lo tih kan hriat a tul a. “An tih chu kan tih a ni” tih kan hriat a ngai.
Mihringin mizia kan nei hrang angin, a then chu biak huphurhawm angreng tak, a then chu biak nuam, a then chu tawng tlem leh tawng duh deuh te pawh an awm ve bawk ang a. Venhimna lam (security) chungchangah te, a hun bi-châ taka thil tih an ngaih avangin lirthei tha leh changkang bîka thuam an ngai a, chu chuan “mipui rawngbawl” an nih a entir.
Chief Minister a nih lai, kum 1996 daih tawh khan Pu Lal Thanhawla hi Sorkar thil pawimawh buaipuia Bombay Airport-ah, thlawhna atanga a chhuk chiah kha vengtute’n zah takin an lo dawngsawng khup a! Pu Hawla chuan, “Bombay-ah lehzel… a va hahthlak ve,” a ti. Chu chuan a entir chu venhimna rip tak kâra khawsak reng te hi an ning ve a ni tih a hriat theih a. Mahse, Sorkar inmikhual dan (protocol)-ah a ngai tlat si a ni.
Chief Minister a nih tawh loh hnu khan Delhi Mizoram House-ah Pu Hawla te nupa chu an innghah fel vek tawh hnuah, hmun danga insawn turin an ti teh tlat a! A tlâwmthlâk hle! Sorkar hotute lal dan indawt kan tih mai “Order of Precedence” a awm a. Tah chuan Ex-CM te hi Cabinet Minister ni lai aiin an la chungnung a. Chuti chunga, Mizoram House atanga chhuahtir an ni ta mai kha; a nihna an hriat loh luat vang a nih a rinawm.
Pu Hawla te nupa hi hriselna lam ngai pawimawh, ei leh in thu-ah pawh Buh (rice) chu an in lama ei ngai meuh lo, thlai lam (Vegetable) hlang deuh chauh ei thin an ni a. Nimahsela, thingtlang an zin chhuah changin khaw pakhata an ei siam, an ei zo chauh kha, a piah leh khuaah an lo buatsaih leh si a; î-he loin a ei phei ve mai zel an ti.
Chief Minister hlui, Pu Zoramthanga pawh hian CM a nih lai khan Aizawl atanga khaw hnaivai deuh leh thingtlang lama a zin dawnin CM behbawm Lirthei paruk (6) velin a zui duah thin kha hnawk a ti ru thin hle niin an sawi a. “Ngawi rû, nangni chu lo kal lo mai teh u,” tih châng a ngah hle a ni, an ti.
CM a nih tawh loh hnu kum 2012 khan Lunglei Circuit House VIP Room-a a innghat fel vek tawh chu, Room dangah insawn tura hrilh leh a ni a. “Nia maw le, khawiah pawh ka mu thei e,” tiin, a Bag nen a inkhai chhuak ve leh mai bawk. A nihna takah chuan a room lo luah tawh chu Mizoram Governor emaw Chief Minister ni lai emaw, Assembly Speaker te chauhin an luanlân thei. Lunglei High Power Committee Chairman (MLA) te’na an chhuh theih a ni lo! Pu Rama hi a zâwna kum 10 chhûng CM a nih lai khan zan lamah a khawharin thutthlengsei ban lukhama TV en ve mai a chîng a, ring nâ (spondylities) a neih phah a ni awm e.
Pu Zoramthanga hi, mi dang tirh kawngah leh thil tih sak tura kawh kawi mai aiin, mahnia tih ve mai tum chi a ni a. Chief Minister, 1998-2008 leh 2018-2023 a nih chhung pawh khan CMO, ama Pisa-ah Dawhkán hruk fai, Electric Power Line fello siam leh Bulb Fuse thlâk ngai ang te, Purdah (puanzár), chhuat phiah, hmunhma hnawk hâwl fai te hi, amah hian a ti leh mai thin a, a staff te mak tih pawh a hlawh fo, an ti.
Hnam dang Chief Minister ngaihsânawm tak pakhat chu. Punjab CM hlui, Surjit Singh kha a ni. Tamil Nadu, Uttarakhand, Andhra Pradesh leh Andaman and Nicobar Islands-ah te Governor leh Union Minister chhuanawm tak a lo ni tawh bawk a. Venhimna nena hual khup reng mai kha a ning ve hle thin a.
A nupui leh amah vengtute zawng zawng pawh thlimin zan laiah inchei danglamin a chhuak ru a. Chandigarh atangin Truck-ah chuangin Delhi a pan a, Lucknow lam thlengin, hmun kilkhawrah, leilet thlâm kawta hruia siam khum (charpoy)-ah te a riak a, mimir dinhmun hriat a duh a ni.
A chang leh an man a, Police Constable-te’n an vin hrep a, lung in-ah an khung titih thul. A mangang ve ta deuh chuan khatih lai UP Chief Minister, Mulayam Singh Yadav-a chu biak a duh thu a sawi ta a! Anni chuan, “Nang tehlul hian kan CM i be lo ang e. Ani te chu pathian tluk lai a sin. I â a nih hi,” an ti a. Singh-a chuan mi naran dinhmun chu a hrechiang ta kher mai. Hlawhtling inti takin a haw ta a! Chuta tanga a zirchhuah chu lehkhabu-ah a ziak ta a, “Story of an Escape” tih chu a ngainawmin hralh a tla takzet zet a ni.
MNF sorkar hmasa 1998 a han ding phat pawh kha. Minister pakhat thingtlanga a nu, Mizo nu mawlmang ve tak mai chu, Police-in a fapa chu an veng tih an han hrilh a. “Awi, ka fapa chu, chuti fahrana vên ngai khawpin a nun a râl-ti a ni maw?” tiin, a tahpui lo chauh a ni awm e!
Chief Minister leh Minister dangte hi a tulna vang zâwka venhimna pêk an ni tih hre lo a, “inti lal” emaw ti tlat kan awm a. “Lal emaw inti” chu an lo awm mial thei a. Mahse, an nihnain a ken tel zawk a ni, tih kan hriatpui fo a pawimawh awm e.