A tumpui chibai duh loh vanga ‘boo’ hlawh Kostyuk

A tumpui chibai duh loh vanga ‘boo’ hlawh Kostyuk
Pathianni khan kum khat chhunga grand slam tourna-ment pahnihna French Open khelh tan niin, hmeichhe singles first round inkhel pakhatah Ukraine do kawnga Russia puitu Belarus player Aryna Sabalenka chuan 6-3 6-2-in Ukraine nula Marta Kostyuk a hneh a, inkhelh bana a tumpui chibai duh lo Kostyuk hi khelmual a chhuah-san laiin Roland Garros mipuiin an boo khum hluah hluah!
Ukrainian hian inkhelh banah chair umpire a chibai zuai a, Sabalenka lam ngaih-sak zui loin a chair a pan ding nghal a, tah chiah chuan Court Philippe-Chatrier mipuiin an boo khum ta a; diriam a hlawh chungchangah Marta Kostyuk chuan Paris mipui kha zak hle tura a ngaih thu a sawi.
Hnehna changtu second seed Sabalenka pawhin khelmual a chhuahsan laia diriam a hlawh kha tha a tih loh thu sawiin, khatiang dinhmuna din kha a phu ve reng a ni lo tih a sawi.
Roland Garros-a tih thin dan ang loin Sabalenka leh Kostyuk hian inkhel tan hmain thla an ladun lo phawt a, ‘traditional pre-match photo’ an tih awm loin coin toss-ah an tan mawl tawp a; Australian Open champion Sabalenka a chak hnuah a chunga tarlan tak ang hian thil a thleng zui a, world number 39 Kostyuk-i’n a chunga mipui chet dan a dem thu hriat tur a awm zui ta a ni.
Kum 20 mi chuan, “Kan rama indona a tawp hnu kum 10 hnu daihah khati ang khan keiin chet thawh ni ila, mipui kha ka dem hauh lo ang. An thiltih kha an hrechiang lo niah ka ngai a, an chet dan kha a mawi lo hle tih an hre lo niin ka hria a, zak ngawih ngawih tur an ni,” a ti.
Khatia mipui an rawn boo tirh khan Sabalenka a phu zawk a, amah zawk emaw an boo a ti hman a, mahse, Ukrainian khelmual chhuahsan tur an diriam tih a hrechhuak thuai a, on-court interview-ah amah an boo emaw a tih hman thu sawi chungin thlawp a hlawh nia a hriat avanga a lawm thu a sawichhuak a, inkhel harsa tak, rilru lama game khirth tak a nih thu a tarlang tel.
Kostyuk hian nikum US Open-ah Belarus player dang Victoria Azarenka pawh a lo chibai duh lo tawh bawk a; kumin January thla khan Australian Open khelhna hmunah Vladimir Putin tantute’n Russian flag an lo lekchhuak lai a hmuhin a rilru a na hle tih a lo sawi tawh bawk.
Inkhelh bana news conference a hmachhawnah Sabalenka chuan, “Ka sawi fo tawh thin angin, indo boruakah Russian athlete emaw Belarusian infiammi emaw pawh ni se he khawvela mi tumah hian indo an thlawp lo. Engtinnge kan thlawp theih tehlul ang ni?
“Indona kan thlawp loh ang bawkin indo titawp theitu pawh kan ni lo a, thei ni ila kan titawp ngei ang a, mahse, vanduaithlaktakin, kan tih theih piahlam a ni,” a ti.
Kum 20 mi Kostyuk thung hian Sabalenka demna sawichhuakin, Russia-in Ukraine a run mekna a dodal tih a la sawi ngai loh avangin a dem tih a sawi a, “Amah, mimalin indona a thlawp lo tih hi a la sawichhuak duh ngai reng reng lo a, a mimal mawhphurhna a tlanchhiatsan zel a, indo duhlohna platform lian hi a hmangtangkai duh ngai lo.
“Ka ngaihdanin tia a thusawi bul tan turah ka ngai a, chumi hnu lamah infiammi dangte chungchang sawi chauh tur a nih laiin amah hian mimala kan ram runna a dem thu a la sawi ngai reng reng lo,” a ti ve tlat.
Kum 25 mi Sabalenka hi Roland Garros-a title la tura rinkai zingah telin, quarter-final thleng pha lo zawnga Iga Swiatek a tlak phei chuan world number one nih theihna chance a nei dawn.
Belarusian world number two Sabalenka hian second round-ah a chipui qualifier Iryna Shymanovich a tum leh ang.
Pathianni hmeichhe singles first round inkhel dangah Czech Republic nula Karolina Muchova chuan world num-ber eight Maria Sakkari lakah 7-6 (7-5) 7-5 hnehna a sualchhuak a, major tourna-ment bika top-10 player tum nga a hnehna chiah a ni.
Greek eighth seed Sakkari hnehtu kum 26 mi Czech Muchova hi first round khel tawhah unseeded player khawng berte zinga mi niin, Grand Slam tournament-ah hian Sakkari bakah player hraw dang Karolina Pliskova leh Ash Barty-te pawh a lo hneh tawh a, nikum khan dulthuar na leh kheimit hliam avangin a talbuai a, kuminah khawng takin a rawn kir leh ta a ni.
A career-a top 10 player vawiriat hneh tawh world number 43 Muchova hian second round-ah Roland Garros semi-finalist hlui dang Nadia Podoroska of Argentina a tum leh ang.
Third seed Jessica Pegula pawh second round lut zingah telin, a chipui American Danielle Collins lakah 6-4 6-2 hnehna a chang a, Grand Slam singles event-a quarter-final la pel zo ngai lo Pegula hian 6-3 6-4-a tualchhung nula Alize Cornet hnehtu Italian Camila Giorgi a hmachhawn zui leh dawn a ni.
Tournament tanni inkhel dangah Pole 21st seed Magda Linette chu 6-3 1-6 6-3-in Canadian 2021 US Open finalist Leylah Fernandez chuan a hnawtchhuak.
Poland player dang Magdalena Frech chuan rin loh takin Chinese Zhang Shuai chu 6-1 6-1-in a sawp a; Belgiun 28th seed Elise Mertens pawhin Viktoria Hruncakova lakah 6-1 6-4 hnehna a sualchhuak ve bawk.
Chinese 19th seed Qinwen Zheng chuan 6-3 6-1-a Tamara Zidansek hnehin, Russian ninth seed Daria Kasatkina pawhin second round a luhna kawngah Jule Niemeier chu 6-3 6-4-in a hneh ve bawk.