Actress hausa ber Jami Gertz
Jami Gertz hming hi kan la hre ngai lo mai thei, mahse, ani hi khawvela actress hausa ber a ni tlat lawi si. A hausakna hi dollar tluklehdingawn 3 (cheng vaibelchhe 25,000 vel) angin an chhut.
He American actress hi lemchan lamah kan hre lar lo a, a hlawhtling lutuk lo te pawh a ni ang, mahse, lemchan khawvela hmeichhe duai lo tak tak Julia Roberts, Angelina Jolie, Jennifer Aniston tih te ai pawhin a sum lakluh hi a tam zawk fê lawi si a ni.
Gertz hi lemchan lamah hlawhtling lutuk lo mah se sumdawnna lamah a hlawhtling ve thung a, a pasal sumdawng mi Tony Ressler nen NBA team Atlanta Hawks neitute zinga an tel bakah sumdawn dang an la nei nual bawk a ni. A lemchan aiin a sumdawnna hi a sum lakluh tamna a ni zawk.
Tunah chuan kum 57 mi a ni ve tawh a, naupan lai atanga lemchan khawvela inhnim tawh a ni a, 1970s khan talent search atanga lar chhuakin, 1981-ah a film channa hmasa ber ‘Endless Love’-ah a inlan a, chumi hnuah film leh TV show hrang hrangah inlan lehin, Twister, Still Standing leh The Neighbours-ah te pawh a inlan. 90s-ah chuan lemchan a chawlhsan deuh a, film panga chiah a chang, mahse, hetihrual hian 2001-a Ally McBeal-a a inlanna avangin Emmy Award nomination a nei ve thung. Lemchan lama a inlanna hnuhnung ber chu 2022-a tlangzarh ‘I Want You Back’ kha a ni.
Actress hausa ber Jami Gertz
Get real time updates directly on you device, subscribe now.