Adviser to CM leh CM thawhho that loh zia a chiang – MPYCC

Sawhthing grade siam chungchangah adviser to chief minister Dr KC Malsawmzauva’n grade A leh B a then a ni dawn a tih hnu ah chief minister Pu Lalduhoma’n grade then a ni dawn lo tih a sawi leh chuan an thawhhona that loh zia tichiangtu a ni tih Congress Thalai chuan an sawi.
Congress Thalai Hqrs. thuchhuak chuan, tunhnaiah adviser to CM hian ZPM inzawrhna, sawhthing lei chungchangah kuthnathawktuten hah leh rim taka an tharchhuah chu a lei hunah sawrkarin grade ‘A’ chauh a lei tur thu leh, chu chu ZPM Research Wing-in an zirchianna leh ruahman dan a ni tih a sawi thu a sawi chhawng.
He thu avang hian kuthnathawktute rilru a na a, ZPM sawrkar chu a intiam anga hma la loa, an insawi loh ang zela a awm avangin an chungah rinna an nghat ngam tawh lo niin Congress Thalai hian an sawi.
Hei vang hian ZPM party mangang chuan party general secretary-ten chief minister hmuin, sawhthing grade A leh B siam tum chungchang an sawipui a. CM hian sawhthing lei leh hralhah grade A leh B a awm loh tur thu a lo hrilh tih sawiin, ‘Hei pawh hi mipui bumna tura phuahchawp mai a nih tih hre turin mipui kan ngen a ni,’ a ti.
Kuthnathawktute chu rinawm lo leh thil ti dik lo thin, rilru pamham pu ah chief minister hian a puh nia sawiin, hei hian an inzawrhna, kuthnathawktute an zah loh zia a tilangah a ngai tih a sawi a ni.
ZPM sawrkar chu an insawi anga engmah ram kaihhruaina tura ruahmanna tak tak nei lo, social media vela an thil hmuh leh hriat anga her kual vel mai mai thin, an kalna apianga thusawi thlak kual an ni tih a tihchian thu Congress Thalai hian sawiin, ‘Kuthnathawktute tan innghahna tlak an nih lo tih mipuiin hria se; ZPM sawrkar lakluh ni-a chief minister-in ni 100 chhunga tih tur a sawinaah thlai thar pali lei nghalna tur an dah tih a sawi zing ami, hmunphiah pawh an lei sak theih loh bakah a chingtute tharchhuah hralhna nasa takin an tihchhiat sak zawk a ni,’ a ti.