AFC home-ah Manipur club pahnih lo kal ngam lo! AIFF-in Aizawl FC game hnih thulh ringawt!

I-League 2023-2024 season khelh mekah Aizawl FC chuan match hnih khelh tur an la nei a, All India Football Federation (AIFF) lamin schedule a tihchhuah tawh angin April ni 9-ah Trau FC leh April ni 12-ah Neroca FC-te nen Rajiv Gandhi Stadium, Mualpuia inkhel tur an nih laiin Manipur club pahnih hi tunlai an ram buai chhuanlamin Aizawl an lut ngam lo a, Mizo team leh Meitei team pahnih inkhel tura fixture siam tawh chu tihtawp/thulh (called off) a ni ta ringawt!
Meitei team pahnih hian Mizorama inkhelh chu a him lo palh thei tiin AIFF hnenah neutral ground-a khelh an dil a, hei hi Aizawl FC chuan pawm loin, Manipur state buai tantirh atanga vawiin thlengin Manipur buai avangin Mizoramah buaina a awm loh thuin a chhanglet a, an home ground RG Stadium-ah ngei khel tura fixture siam turin AIFF hnenah thu an thlen ve nghal.
A vawihnihna’n AIFF chuan Aizawl FC chu duhthlan tur pahnih pein neutral ground Kolkata, Shillong emaw Guwahati-ah emaw match pahnih hi khel mai tur emaw match pahnih hi khel loin team pahnihte’n point khat ve ve zela insem mai ni se tiin Aizawl FC chu an rawn hrilh leh a, Mizo club chuan AIFF option pekte chu hnar fithlain, March ni 26, 2024-a AIFF ngeiin schedule a lo tihchhuah tawh angin Aizawlah ngei an home match khelh an duh thu leh Mizoram chu India rama state ralmuang ber, Manipur buai avanga boruak ngaihmawhawm chhete pawh a thlenlohna a ni a, hetiang a ni chunga Manipur club pahnihin Aizawla khelh an theihloh chhana ’coach leh player-te’n an hlau’ tih chhuanlam an hmang chu intihmingchhiat tumnaa an ngaih hial thuin AIFF-ah thlen leh a, dan dinglai anga Aizawla khelh ngei an phut tih an tichiang nawn leh bawk.
AIFF chuan April ni 9, Thawhlehni zan khan Aizawl FC leh Manipur club pahnih-te Aizawla an inkhelh tur chu thulh a ni tih hriattirna an tichhuak ta ringawt a, tun season atan AFC home match a awm dawn tawh lo a ni.
He thilah hian AFC chu an lungawi lo hle a, club neitu leh Hachhek bial MLA ni bawk Robert Romawia Royte chuan Manipur club pahnih Aizawla an lo zin duh lo chu a dem a, AIFF-in a rawn tir theilo pawh mak a tih thu a sawi bawk.
League match pahnihah hian point thum ve ve an pe lo a nih chuan a tul anga hma an lak tur thu leh point thum ve ve an pe a nih pawhin an lawm a kim chuan loh tur thu a sawi a, football nawmna chu a taka inkhelh a ni a, chu chu a thleng ta si lo tiin AIFF leh Meiteho chet dana a lawmloh thu a sawichhuak.
League match tihtawp a nih thut takah chuan club neitu Romawiate chhungkua chuan an chenna in Chhinga Vengah AFC player leh staff-te pualin season tawp zanriah an buatsaih a, he hunah hian tun season-ah kum dang ang lo taka nasa taka harsatna club management-in a tawh thu puanchhuah a ni a, coach leh player-te chungah club hotute’n lawmthu an sawi nghal.
Team aiawha thusawitu club sporting director Hmingthana Zadeng chuan hlawkna pakhat mah beisei tur a awm lo tih hre sa chung leh 100% loss chungin kum 10 chuang Mizo thalaite hmakhua ngaiin Robert Romawiate chhungkuain AFC an enkawl tih a sawi a, he club zarzotu player hlawhtling tak tak tam tak an awm tawh thu leh AFC neitute chu football chhungkuain an zah a, an ngaihsan em em thu a tarlang tel.
Aizawl FC hian I-League 2023-24 season-ah bul an tan tha lo chungin an insiamtha a, 1st phase chu top 4-a awm chungin an khar nghe nghe.
2nd phase-ah player inhliam neuh neuhte’n a tihbuai avangin an duhthusam ang leh beisei angin an khel thei lo a, tun dinhmunah match hnih la khelh tur nei chungin table-ah pakuana an luah mek.
Tarlan tak angin, an match hnih khelh tur la neihte hi called off a nih takah chuan engtinnge All India Football Federation lamin thuthlukna an siam ang tih a la chiang lo a, AIFF thuthlukna azirin an position hi tun aia sang hretah pawh an la awm thei a ni.