Afghanistan-ah hmeichhia ten university rap thei lo

Thlasik chawlh zawh hnuah Afghan university te chu hawn a ni leh tan ta a, mahse, hmeichhia te tan chuan lungchhiat thlak niin an tel ve phal loh zui a ni zel ta thung.
Nikum khan higher education ministry chuan hmeichhe zirlaite chu class an kal ve phalsak an nih tawh dawn loh thu a puang a, kum 2021 a Taliban tena Kabul an lak hnua hmeichhe zirlai te kal zel an phalna chu an chawk chhia a ni.
“Tunah chuan engmah lo mai ka ni ta” tiin fourth-year computer science zirlai chuan a sawi a. “Ka tum chu university zawh a, master tihzui leh a, chumi hnuah PHD tihzui leh a ni a Ram tan, kan ram mi te tan theihtawpa thawh ve tum ka ni a, tunah chuan engmah tihtheih ka nei dawn ta lo,” tiin a sawi.
A hma lawk thla kalta kha chuan amah leh a thiante chuan graduation hun atana inpuahchahna te an sawikhawm hlawm a nia. Hmeichhia tam tak te chu an tap hawm hawm a, an unaupa leh thian mipa tena zirlai an chhunzawma class an kal lai chu rilru na takin an thlir liam hlawm.
Kum 19 leka upa hmeichhia Atefa chu Herat khawpuia computer science student a ni a, university entrance exam paltlang hlimhlawl niin website developer nih tum a ni a, mahse, tunah chuan engkim a tawp vek. “Exam a hlawhtling ngei turin ka thiante nen theihtawp tak meuh meuh kan chhuah a, mahse, kan tum leh chak kan ni thei dawn ta lo, a tawp ta,” tiin a sawi.
Taliban te chuan thuneihna an chan hnuah hmeichhiate dik leh chanvo leh zalenna te chu a tahtawlin an hmet tawm nasa tial tial a. Nikum khan secondary school-ah hmeichhiate an kal an remti tawh lo bawk a, tunah university an kal a remti lo leh a ni.
Taliban te chuan sawifiahna an neihah dress code bawhchiatna tih te, fund tam tawk lo tihte syllabus te chu Islamic nena inmila zawka siamrem phawt ngai tihte chu chhuanlama an hman tlanglawn a ni.
Mahse, thil chiang tak awm nia sawi chu Muslim puithiam Taliban supreme leader Hibatullah Akhundzada thrawn petu ber ber te chuan hmeichhiate hnathawh leh zirna an kalpui chu remti lo bur tura an tih vang tia sawi a ni.
A hma pawhin university te chuan mipa leh hmeichhia te chu thuthran tir mai piah lamah a hranin class an pe sa tawh a. “Hijab khum ru an tih chuan, lawm takin kan khum mai a. Class hrangin nei rawh u an tih pawhinlawm takin kan zawm leh mai a, kan zir theihna a nih chuan engkim lawm takin kan zawm mai,” tiin Kabul university-a hmeichhe zirlai pakhat chuan a sawi a.
Mipa te pawhin hrehawm an ti tho va, university kal leh chu hmeichhe tel lo chuan mithi vui ang mai an nih thu sawiin, “mipa te hmang chauhin ram i siam thei lo” tiin zirlai mipa pakhat chuana sawi a, “Rit phur inchhawk turin hmeichhia te nena thawhhona tha kan mamawh a ni,” a ti bawk.
Lungawilohna chhete te lantir a ni a, mahse, lianthama kalpui ngam an awm lo. Taliban te chu Quran ah hmeichhia te zirna an kalpui khapna inziahna hrilh hre tura cho te pawh an awm bawk a. Mahse, langsar taka ti ngam an awm chuang lo.