African hoin Infantino an thlawp

African hoin Infantino an thlawp
Kumin World Cup laia Argentina-in uchuak taka Fifa duhsakna a dawng bika ngaihna leh puhna zawng zawng phurtu Fifa president Gianni Infantino chu bang tura duhtu an rawn lawr sup sup laiin Africa khawmualpuia an football hotu lawk zual panga laiin an thlawp thu an puang ve thung!
Infantino hian tunhnai khan World Cup kaltlanga sum tam zawk huiluh tumin mimal sumdawngte hnena World Cup chanpual hralh tura ruahmanna (Fifa Forward Enterprise) a siam thu a puang a, chu chuan a laka rinna tlahniam tawh sa a belhchhah a, Fifa president thlan thar leh hun pawh nghak khaw tlai loa bantir duhtu an rawn inlar zui tuam tuam a nih kha!
He boruakah hian African football-a an hruaitu lawk leh huhang ngah zual pangate chuan tunhnai khan khawvel hriatah Fifa president Gianni Infantino an thlawp thu leh election a chuh leh turah pawh an thlawp tur thu an sawi chiang.
World Cup revenue tam zawk huiluh tuma chanpual hralh a tumna a sut hnu lawkah African administrator-te hian Infantino thlawpna an auchhuahpui ve nghal a; an thlawp chhan bulpui chu Fifa member association-te hmasawnna tur sum (development fund) tihpun a tum thu a puan tel vang a ni ber.
Fifa member association tam zawk hi sum lama buai ve tak tak an ni hlawm a, African lam pawh hi indaih lo reng renga khawsa an nih ve bawk avangin an sum hmuh tur tihpun tiamtu chu football tan a tha em tih lam ngaihtuah hman loin an thlawp chawt a ni ber ang chu!
FIFA sum pekchhuah leh tur (baseline funding)-ah chuan kum li dan zelah member association pakhat zel tan US dollar maktaduai 8 dah a ni a, hei hi African federation tam tak tan chuan an hnuk pawimawh a ni ang.
Confederation of African Football (CAF) hnuaiah hian member 54 zet awmin, he’ng zinga a lian leh thiltithei zual panga hotu lawkte chuan ziakin Infantino an thlawp thu leh World Cup revenue punna atana chanpual hralh tumna a sut leh chu tha an tih thu an thawn a; CAF bik hi chuan thuchhuah an la siam lo a, commercial rights hralh tura ruahmanna thlauhthlak leh tak chungchang vawiin hian thlirho an la tum chauh a, president thar thlan leh turah Infantino an thlawp ngei dawn emtih pawh an la sawi chiang lo.
CAF hnuaia committee member lawk zual pangate erawh chuan Infantino hi an thlawp hlawm a, chu’ngte chu CAF Vice President Fouzi Lekjaa (Morocco) bakah FIFA Council member dang Hany Abo Rida (Egypt), Hamidou Djibrilla (Niger) leh Ahmed Yhaya (Mauritania) an tel.
Anni bakah hian Democratic Republic of Congo football federation president atana thlan thar leh CAF general secretary hlui ni bawk, Switzerland ram university pakhata Infantino nena lehkha lo zir tawh Veron Mosengo-Omba pawhin Fifa president thlawpna a thawn ve tawh bawk.
Vawiin hian Confederation of African Football executive committee an thukhawm dawn a, he hunah hian World Cup commercial rights hralhna atanga US dollar vaibelchhe 4.2 zet hmuhchhuah tumna sutleh a nih chungchang an ngaihtuah tel dawn a nih kha.
Hetih lai hian Asia, Europe leh CONCACAF (Confederation of North, Central America and Caribbean Association Football)-te chuan karliamta tawp lam khan Infantino hruaitu nihna an rin tawk tawh loh thu an puang a, nakkum March thlaa Fifa presidential election lo awm leh tur thlira fund a tihpun pawhin confederation pathumte hi a hmin zo tawh lo a ni!
Khatia sawiselna a tawh tak nuai nuai hnu lawk, karliamta Nilaini khan Gianni Infantino chuan Morocco ramah Fifa senior leader rual kokhawmin meeting a neihpui tawh nghe nghe.
Infantino ruahmannaa World Cup chanpual hralh then rawtna kha Fifa chief of global football development hna chelh mek Arsene Wenger bakah secretary general Mattias Grafstrom leh Jordanian Football Association president Prince Ali-te pawhin an dodal thu an puang tawh a ni.
Karliamta khan Infantino hi Morocco ramah a tap chawt a, an khawpui Rabat-ah executive meeting-te a han ko a; kumin World Cup laia Argentina tan luat vanga a hmingchhiatna te, World Cup laia US president Donald Trump nawrna avanga American player red card hmuh hnuhkirleh chungchang bakah World Cup chanpual hralh tumna avanga sawisep a kai mekna atanga a dinhmun tleu tawh siamthat leh chu a meeting koh chhan ni ber ni turah an ngai!