AFSPA hman lohnaa AR chet dan MZP-in remti lo

AFSPA hman lohnaa AR chet dan MZP-in remti lo
Armed Forces Special Power Act 1958 (AFSPA) hman lohna, state ralmuang Mizorama Assam Rifles-in inlulin an tum chu an remti lo tih Mizo Zirlai Pawl chuan an sawi.
MZP Gen. Hqrs. thuchhuak chuan, minister F Rodingliana zin haw lam, 2 Assam Rifles-in an lo dan buai chu an thuneihna piah lam thil a ni, tiin, ram ralmuang taka Assam Rifles chetna chhuichiang a, a tul anga hma la turin Mizoram sawrkar a ngen tih a sawi.
‘Armed Forces Special Power Act 1958 (AFSPA) hmanna state pawh ni lo, Mizorama Assam Rifles-in minister an lo dang ngawt mai hi enliam harsa kan ti a. Thuneihna hmansualna awm ngeiin kan hria a. Democracy hnuaia Mizoram mipuiin kan aiawh tura kan thlan chhuahte zah lohnaah kan ngai a, hetiang thil thlen nawn hi kan remti dawn lo,’ a ti.
Minister dang tura thu petu leh harsatna bultumtu, a kaikuang chu chhuichhuak a, Mizo mipui leh Assam Rifles inkara inhriatthiam lohna thlentu chu a ranglama sawnchhuak thuai turin thuneitute an ngen tih a sawi bawk.
‘Indo-Myanmar ramria awm kan nih avangin Mizoramah para military & central force an la awm reng dawn a. Mizo mipui nen thawhhona tha awm zel se tih hi MZP duh dan a ni. Ram himna tiderthawng leh dan kalha che dodalna ni lo, mipui tana hnawksak zawnga hma lak leh Aizawl atanga Zokhawsanga an insawn hreh vanga buaina siam tumna a ni em tih kan vil zui dawn,’ thuchhuah chuan a ti.
Tribal hnamte engahmah ngaih lohna a nih avangin, hetiang a thlen nawn tawh loh nan MZP chuan Union Home ministry-ah he thil thleng hi a thlen dawn tih a sawi a ni.