Agriculture Link Road 8 leh tuikhuah 39 hawng

Sihphir leh Sihphir Venghlun huamchhunga Agriculture department hmalaknaa siam, kilometer 16.58 a thui Agriculture Link Road pariat bakah tuikhuah 39 chu Thawhtanni khan chief minister Zoramthanga’n a hawng.
Kuthnathawktute tana hmasawnna hnathawh hrang hrang hawn a ni chu lawmawm a tih thu leh, kuthnathawktute hmasawnna tura Agriculture minister leh a thawhpuite hmalakna fakawm a tih thu chief minister hian a sawi a. Mizoram chu ram leilung tha, thlai engkim that duhna ram a ni, tiin, an thlai thar phurhchhuahna kawnga kuthnathawktute harsatna tawh chu sawrkarin a hriatpui thu leh awlsam zawka thlai thar an phurhchhuah theihna tur kawng siam chu sawrkarin a ngaipawimawh a, hma a lak zel tur thu a sawi.
Kum hnih chhung vel buaina chi hrang hrang avangin sawrkarin harsatna tam tak tawk mah se, heng harsatna karah pawh mipui mamawh ei leh barah harsatna tawk loa sawrkar a kal thei leh hmasawnna ruhrel din a ni zel chu lawmawm a tih thu a sawi bawk.
Agriculture minister C Lalrinsanga chuan a department chan Agriculture leh Irrigation & Water Resources hnuaia hmalakna a sawi a. A sawi zingah Sihphir khuaah PMKSY ‘Har Khet Ko Pani’ scheme hmangin mi 20 hnenah tuizem pek a ni te, RKVY hnuaiah Sihphir leh Tuirialah Solar Cold Storage din a nih tur thu te, PM KUSUM hnuaiah kuthnathawktuten tui pump-na khawl an neih thuai tur thu te a tel. Tuihna humhalh kawnga hmalakna kal zelah Sihphir Dakla lui bakah Dialdawk lui chu Brahmaputra Board hnuaiah zirchian a ni dawn tih sawiin, kuthnathawktu kalkhawmte chu Sihphir Neihbawi tlanga OP-12 Biofertilizer buatsaih chu hmang tangkai turin a chah.
Chief minister-in a hawn takte hi scheme hrang hrang, Special Assistance to State for Capital Expenditure, NABARD Rural Infrastructure Development Fund bakah Rashtriya Krishi Vikas Yojana – Remunerative Approaches for Agriculture and Allied Sectors Rejuvenation hnuaia Agriculture Link Road laih thar pathum km.7 a sei leh kawng awmsa 5 ah PCC flooring km 9.58 a sei cheng nuai 547.98 senga siam; Pradhan Mantri Krishi Sinchayee Yojana hnuaiah tuikhuah 39 – secondary structure 1 leh water harvesting structure 38 cheng nuai 36.20 senga sakte a ni.