Mizorama tlanchhia Zo hnahthlak, BSF te’n an kirtir lehte chin hriat a ni rih lo a, a tam zawk chu ramhnuaiah an la biru tih thu dawn a ni.
Thu dawn danin, Thawhlehni zanah khan mi pali panga vel chuan Parva lui an kan a, Lawngtlai district-a khaw remchanga luh an tum. Lui an kanna atanga khaw hnai chu Mautlang a ni a, mahse BSF an hlauh avangin chhunah chuan bihruk a ngai dawn.
Chin hriat lohva awmte hi June ni 15-a Mizorama lut, BSF te’n a tuka an kirtir lehte an ni a, Bangladesh-a Chittagong hill tracts-a Zo hnahthlakte an ni.
Mahni khuaa kir leh ngam chi a ni lo a, an chungah Bangladesh sipai an thinur avangin mahni khuaa let leh hi thil tih chi-ah an ngai lo. Mizoram pana an tlanchhe tur pawh hi a ruka chhuak an ni.
Thu dawn danin, an zinga pakhat chu Bangladesh sipaite’n an hmu a, tlanchhe chungin khua a lut a, ani hi khuaa let leh chu a ni deuh mai.
Lawngtlai district-a Kamtali khua atangin BSF te’n ramri-ah an vaiin an dah a, mahse mahni khuaa let leh lovin ramhnuaiah an biru zui tih thu dawn a ni.
Raltlante lo buaipui thintu pakhat chuan khaw chhe hnuaiah ramhnuaiah hian an awm tih a sawi a, an eitur rawn paiin a daih tawh lo mai thei a, changel leh rawtuai an rin a rinawm thu a sawi. Khua a chhia a, inthuam lumna tur leh mut bu nei lo chungin ramhnuaiah an tuar tawp mai nia an rin thu a sawi bawk.
Dam lo an awm nual tih a sawi a, pitar pakhat phei chu a dam loh avangin kein a kal thei lo a, Kamtali atang pawh khan BSF te’n motor-in an hruai tih a sawi.
An chettlatna vel nia rinah hian BSF an duty ngawrh em avangin a bul vela chengte pawhin an pui thei lo a, an awmna velah hian an kal thei lo tih thu dawn a ni. Va kal chilh tumte pawh an awm thin a, BSF an paltlang thei lo tih thu dawn a ni bawk.
BSF te’n an kirtir raltlante hi an tam lam chiang faka hriat a ni rih lo a, mi 200 chuang chu an ni. Hmeichhia leh kum upa lam an tam nia sawi a ni.
Raltlan kirtirte chin hriat rih loh
Get real time updates directly on you device, subscribe now.
Prev Post
Next Post