Air India flights vengtu tur ti tam dawn

Air India thlawhna-in Sikh for Justice (SFJ) inti te atanga invauna a dawn vangin Air India chuan venhimna nasa lehzual neih a tumin India sorkar pawhin Canada thuneitu te chu sawipui a tum.
He invauna hi SFJ hotupa general counsel Gurpatwant Pannun in video hmanga a sawi niin Inrinni khan tlangzarh a ni a. He video-ah hian Punjab-a Sikh te chu hrilh in, “November 19 hnu lamah chuan Air India ah chuang suh, i nunna atan a hlauhawm a ni”, tiin, he thu hi vawi hnih a sawi nawn a ni. He video-a a thusawi rual hian Pannun chuan ‘Global blockade’ a nih tur thu sawiin Vancouver atanga London chu thlawhna hmanga zin khar a nih tur thu a sawi a ni.
Hindustan Times zawhna a chhannaah India High Commissioner to Ottawa Sanjay Kumar Verma chuan, “Canada sorkar thuneitute nen Air India Canada atanga lo thlawk chhuak leh thlawk lut te rikrap an nih dan ngun takin kan ngaihtuah ang” tiin a sawi a ni. Air India hian kar khat chhung ringawtin Canada khawpui Toronto leh Vancouver atanga Delhi direct flights hi a thlawh tir a ni.”Video-a thil sawi te ngun takin kan zir chiang tawh a, Chicago Convention bawhchhiatna dik tak niin he Convention-ah hian khawvel hmun hrang hranga thlawhna thlawh dan tur ruahmanna a awm vek a ni. Khawvel ram hrang hrangte zingah Canada leh India chu he Convention ah hian member an ni ve ve a ni. India leh Canada ten civil aviation chungchanga inremna kan neih ah hian rikraptu te beih let dan tur a awm tel a ni,” tiin Verma chuan a sawi bawk.