AIR kum 90 tlin pualin hmang

AIR kum 90 tlin pualin hmang
All India Radio (AIR) kum 90 tlin lawmna kalzelah Thawhlehni khan All India Radio Aizawl chuan Musical Concert an buatsaih.
Hmanpuitu IPRP&S minister B Lalchhanzova chuan, All India Radio chuan Mizo hnam zia leh tawng vawnhim kawngah tangkai takin hna an thawk a, Mizo hnam nun vawnghimtu pawimawh tak an ni tih a sawi.
Mizo thu leh hla chawilar kawngah, mahni hnam ngaisang tura inzirtirnaah leh nun dan tha midang zirtir kawngah an thawh hlawk hle tih a sawi bawk
AIR Aizawl director, Mizoram Cluster head DR Lalropuia pawhin All India Radio bul tan dan sawiin, India ram zalen hma atang tawhin mipui awitleitu ber an lo ni tawh thin a, thuthar puanchhuahna ringawt niloin, India hmasawnna tura thawktu sawrkar leh mipui thlunzawmtu tangkai tak an ni tih a sawi a ni.
All India Radio hi 1936 June 8-ah din a ni a, New Delhi-ah headquarters a awm. AIR Aizawl hi India ram puma AIR Station 230 zinga pakhat a ni. AIR kum 90 tlin pual hian AIR Aizawl chuan May 8 hian walkathon a buatsaih dawn a, a lawmna pui ber chu June 8-ah neih a ni ang.
Kum 90 tlin lawmnaah hian AIR top grade artist Vanhlupuii leh ‘A’ grade artist pali – Laltlanthangi Pachuau, Siampuii Sailo, C Vansanga leh Rualthankhuma Chhakchhuak te chawimawi an ni a, zai leh lam nen hun hman a ni.
All India Radio kum 90 tlin lawmna pual hian AIR Aizawl pawhin kum 60 a tling a, hemi pual hian programme hrang hrang buatsaih chhoh niin, Aizawl bakah cluster hrang hrangah hun hman a ni.