Concrete kawng siamna atan cement siamtu company thawhpui turin rawn

Union minister of Road Transport & Highways Nitin Gadkari chuan Aizawl leh Thenzawl inkar kawng national highway-a puang turin tihfel thuai tum a ni tih a sawi a. Mizorama kawngpui ho cement concrete hman uar turin cement company nen man tlawm zawka lei dan ngaihtuah turin a rawt bawk. Chief minister Lalduhoma chuan Thawhtanni zan New Delhi-ah Union minister hi a kawm a. Aizawl -Thenzawl kawngpui national highway-a puang tura a lo ngen tawh thin chu a sawipui. Detail project report siam mek a nih thu leh sanction thuai tum a nih thu a lo hrilh.
Mizoram chhunga kawngpui an tlo zawkna atan kawngpui project thar chu concrete road-a siamsak tura chief minister-in a ngen chungchangah, cement factory nen inberem a, cement man tlawm deuh zawka lei a, concrete road siam theih a rinawm, tiin a lo rawn a. Ministry of Road Transport & Highways (MoRTH) leh NHIDCL hotute pawh bitumen man zaa 40-a a to chhoh tak avangin ngaihtuahna seng a, hma la turin a hrilh nghal.
Mamit to Bairabi NH-06 spur tichangtlung tura ngenna chu sanction nghal a nih tur thu a lo hrilh a. A senso tur awm ang pawh an sawi dun nghal a ni.
Vairengte to New Vervek NH-306A kawng chhuat siamtha tura a ngenna pawh state PWD ruahmanna (proposal) a siamthat ngai thenkhat siamthat a nih hnuah sanction a nih tur thuin a lo chhang a. NH-502 Zero to Siaha double lane-a siamsak tura ngenna chu ram lak (land acquisition) man sang lutuk tihhniam dan zawng turin state sawrkar a lo ngen let a, sanction thuai tuma ministry-in hma an lo lak tur thu a hrilh.
NH-108/ NH- 44-A kawnga Teirei lei leh Langkaih lei chu Tripura nena inkalpawhna pawimawh a nih avangin lei tha mamawhna a sang hle tih chief minister hian a sawi a. A thawhna tur sum sanction thuai a tul tih a thlen. Union minister hian DPR siamthat (modified) thehluh ran ni se, MoRTH duh dan ang a nih chuan sanction thuai a ni ang, tiin a lo hrilh.
National highway ni thin, double lane alignment thar a kal tak avanga ngaihsak zui loha awm, state PWD-a la hlan fel si loh, kawngpui pawimawh 6 one time improvement chungchang a sawipui a. National highway kawng hlui an nih ngei chuan sanction a, resurface tur a ni tih a lo hrilh bawk.