Airport an hralh hmain ZPM kan hralh thuai thuai a ngai – MPCC president

On Feb 1, 2025 12 0

Airport an hralh hmain ZPM
kan hralh thuai thuai a ngai
– MPCC president
Lengpui Airport an hralh hma ngeiin ZPM zawk hi hralh thuai an ngai tih Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara chuan, Congress sawrkar laiin IAF hnenah Lengpui Airport hlan an lo tum tawh tia sawi chu sawifiahin, “Kum 2015-ah Congress sawrkar laiin kan larsap MM Lakhera khan IAF-a hlan a that ringin lehkha a ziak a, chumi dungthul chuan chief minister pawhin lehkha a ziak a. Mahse, karkhata hnuah chief minister-in lehkha a ziah chu a sut leh nghal. Larsap-in a rawtna chu, ‘a tha ang a’ an tih kha, a that loh tur zia hrechhuak lehin karkhat chhungin an sut leh a ni,” a ti.
Congress party-in ram rotling an siam, Tuirial Hydel Project, Lengpui Airport, Medical College chu ZPM sawrkarin enkawl thiam loin tihral a tum tih a sawi a. “Kan airport neihchhun min hralhsak hma in, ZPM hi kan hralh thuai a ngai,” a ti.
Sum leng vak a tlem reng chhan chu sawhthing leina atan sum dahthat vang niin MPCC president hian a sawi. “Sawhthing leinana development sum an dahtha a nih chuan a hriatthiam theih a. Mahse, Central BJP duhdana an awm hma chuan sum puk ngaia an buai an buai a ngai. Chanchintha thehdarh khaptute nena inzawm reng chung hian kan ramah Pathian ram an thlentir ka beisei lo,” a ti.
ZPM party-in ram rorelnaah Pathian ram thlentir an tum thu an sawi a. Mahse, tunah chuan Pathian ram ni loin ZPM ram an thlentir mek tih a sawi a. “Kan thalaite pawhin uluk taka chhut leh ngaihvena tuna kan hrawn mek hian enge an thlen dawn tih an chhut a ngai a. He sawrkar mekah hian beisei a sang lo hle in ka hria,” a ti.