Lengpui Airport thawmthat dan leh hnathawktuten bungrua an tihchhiatte a thara thlak tura phutin Congress party chuan ‘Lengpui Airport Chhanchhuah Hnatlang’ an ko.
-- Advertisement --
MPCC Action Committee huaihawtin Zirtawpni khan Congress party hian Lengpui Airport an tlawh a. Airport hungchhunga luh phalsak an nih loh hnu ah pawisa chawia luh an dilna pawh phal a nih loh avangin police nen an innek deuh a, an nawr tlang lui ta nia thu dawn a ni. Contractor-in hnathawh nana trolley an hman chhiat, cement leh iron rod nawrna atana an hmante thlak a nih leh nih loh hmuh an phut a. Trolley hlui chhe tawh tak 14 dahchhuah a ni a, a hnuah mi tlemte terminal chhungah luhtir niin, trolley thar hmuh tur a awm lo a, a chhia thahnem tak chauh a awm nia sawi a nih bakah contractor hman balh tawh tak 20 vel nawr lirh theih a awm tih sawi a ni.
Lengpui Airport-a contractor-ten trolley an tihchhia nia sawi vangin National Students’ Union of India chuan kumin January khan zirchiangin, trolley 300-400 awm thin chu 25 chauh hmantlak a awm tawh tih an hmu a. Contractor-ten trolley an tihchhiat hi ni 15 chhunga a thara thlak vek turin an phut a. Hun tiam, 2023 February 7 a ral thlengin thlak a ni loa, thlak tumna a awm lo nia an hriat bakah sawrkar atangin contractor laka action lak a awm lo nia an hriat bawk avangin hetiang hian hma an la ta tih an sawi.
MPCC Action Committee chairman H Zairemthanga chuan Lengpui Airport hi cheng vaibelchhe 97.92 sengin Congress sawrkar lai December 1995 ah sa tanin, kum hnih leh thla hnih chhung, Congress sawrkar lai vek 1998 February-a zawh a ni a, enchhin ngai neuh neuh a tam avangin Congress sawrkar laia hawn hman a ni lo a. MNF sawrkar pian hnu lawk, 1998 December 2-ah hawn a ni ta tih a sawi. “Lengpui Airport neitu nihna hi kan thinlungah a awm tlat a, tih hmelhema a awm hi kan duh loa, kan rilru a na a ni,” a ti.
Airport chhung leh a pawn cheithat hna chu M/s Zoramchhana leh M/s KR Construction hnenah restricted tender hmanga pek, a vaiin cheng vaibelchhe 116 man a nih thu leh work order pek an nih hma daiha hna an tan thu te Action Committee chairman hian sawiin, “An hnathawh a tha loin, tui pawh pek pek mumal a ni loa, nakinah chhiatna rapthlak zawk a thleng ang tih hlauhawm a ni,” a ti.
Congress Thalai president Dr Lalmalsawma Nghaka chuan Mizoram sawrkar GAD Aviation-ah sum chingpen tam tak a awm tih hria in Lokayukta-ah FIR an thehlut a, Lokayukta hian CBI chhuitir nise a ti a, order a chhuah atanga kum hnih liam tawh hnu ah MNF sawrkarin engmah a la ti lo tih a sawi a. Lengpui Airport chim chungchangah pawh Congress Thalai-in FIR an thehlut a, MNF sawrkarin engmah a ti chuang lo tih a sawi.
MPCC hian Lengpui Airport hmunah hetiang hian resolution an pass:
# Airport thawmthat hna thawktu contractor tihchhiat bungrua (trolley) a thara thlak a nih hma chuan hnathawh chhunzawm kan remti lo
# Lengpui Airport cheithat hna thawktuten bungraw thiar nana an hman avanga trolley chhia zawng zawng hi a rang thei ang berin a tharin thlak se, a tichhetu contractor hi hrem ngei rawh se. Airport-a duty officer-ten dan an lekkawh theih nan zalenna pe rawh se.
# Airport building sak mek chim leh hna inpek dan dik lo chungchanga Lokayukta-a FIR thehluh hi a rang thei ang bera chhuichhuah a nih theih nan, sawrkarin Lokayukta kut phuar lo suh se
# Lokayukta-in Mizoram sawrkar hnuaia GAD Aviation Wing-a sum tam tak chingpen chungchang chhui tura CBI koh luh a rawt ang hian MNF sawrkar hian ko lut thuai rawh se.
# MNF sawrkar hian hnamdang contractor aiin Mizoram mipui min ngaipawimawh zawk rawh se.