Aizawl ah World Entrepreneurs’ Day

UNO-in khawvel huapa ni hman bik a neih zing ami, World Entrepreneurs’ Day 2023 chu Thawhtanni khan entrepeneur thenkhatten Aizawlah an hmang.
He hun hmanpuitu Labour, Employment, Skill Development & Entrepreneurship (LESDE) director Angela Zothanpuii chuan Mizoramah LESDE a din hnuah an phak ang tawkin hma an la a, entrepreneurship chawikan leh chawisan chu hna hmanhmawh a ni tih a sawi. Hun hmanpuitu dang Mizoram Rural Bank chairman Sheryl Vanchhawng pawhin MRB chu entrepreneurship chawikan nana pawimawh funding lamah theihtawp an chhuah mek tih a sawi a ni.
Kum 2010 atangin UN level-ah khawvel pum huapin August 21 hi World Entrepreneurs’ Day anga hman tan a ni a. He ni hian entrepreneur-te intihhlimna leh sharing hun atana hman thin a nih bakah entrepreneur thate chawi-mawina atan hman thin a ni.
Aizawla World Entrepreneurs’ Day hmanaah hian Dr Vanlalsiama Chhangte (Ebenezer Medical Centre) chuan entrepreneurship lama leadership pawimawh zia a sawi a. Danny Hmar, MBA (IIM-A) chuan marketing chungchang a sawi bawk.