Aizawl-Champhai kawng a ping

Aizawl leh Champhai inkar, National Highway 102B Keifang leh Tuivawl inkar, Keifang atanga km.8 vela hla kawng ko chu Thawhlehni chhun khan lirthei eng chi mah kaltlang theih lohin a min a, tih tlang theih tumin khawl nen inchhawp nghal ni mah se, la tlak belh thei reng a nih avangin hma lak mai theih a ni lo.
Thudawn danin, lung khawkrawk hmun rawn tla a nih avangin lirthei mai ni lo, mihring tan pawh kaltlang mai hlauhawmin Thawhlehni chawhnu lam thleng khan a la awm a. Champhai tlangdung leh Aizawl inkara kal ngaite pawh Saichal lam atanga hel tum theih ni mah se, ruah a sur chuan helai kawng pawh hi zawh harsa tak tho a ni tih sawi a ni.
Hetihlai hian Ngopa leh Tuivawl inkar kawng, National Highway No.6 Manipur pawh tura NHIDCL hnuaia contractor-ten an laih mek chu zawh harsa khawpin a chhe tawh nia sawi a ni bawk.
Khuarel chhiatna leh kawng laih vanga chhe satliah chu hriatthiam theih a nih rualin, tun dinhmuna kawng chhiat dan erawh hnathawktu contractor lam inthlahdah vanga thleng a tam zawk an rin thu helai tlangdung khawtlang hruaitute chuan an sawi a. Maxi cab service pawh tlan ngam loh chang an neih fo avangin thuneituten a rang lama hma lakpui turin an duh tih an sawi.