Aizawl district-ah tui renchem leh a hna humhalh zirtir dawn

Aizawl district-ah tui renchem
leh a hna humhalh zirtir dawn
Aizawl District Water and Sanitation Committee chu an chairman, bawrhsap Dr Lalhriatzuali Ralte kaihhruaiin Ningani khan an thukhawm a. District khaw hrang hrang leh Aizawl khawpuia faina leh tuihna humhalh kawnga hmasawn dan tur sawihoin ruahmanna an siam.
Bawrhsap chuan Mizoram khaw hrang hrang leh a bikin Aizawlah a kum telin tui a vang telh telh a, ramngaw kan thiah zel avangte, sik leh sa inlumletin a thlen leh chhan tam tak vanga tui harsatna kan hmachhawn mek hian ziaawm lam a pan theihna’n tan lak a tul tawh takzet, tiin a sawi. Mipuiin tui renchem leh tui khawl dan, tuihna humhalh dan, faina chungchang leh bawlhhlawh paih fimkhur a ngaih zia inzitir a, a taka kan nunpui a hun tawh hle tih a sawi a ni.
Thutkhawma report danin, Jal Jeevan Scheme hnuaiah Aizawl district-a khaw hrang hrangah tui pekna tur PHE department-in a buaipui a. Khaw 64 zingah khaw 16 tan solar pumping (ni zung chakna) hmangin tui lakna siamsak mek a ni. Solar pump hmanga tui pekna tur buatsaih hna hi zaah 60 vel zawh tawh a ni a; ni zung chakna hmang lo, a pangngaia tui lakna tur siam chu zaa 70-80 thawh zawh tawh a ni. Thingtlang khuaah tui hi pump loin gravitation hmanga lak a ni thin a, tui a kam chak tak avangin khaw tam takah pumping system hman a tul ta a. Heng hmunahte hian nizung chakna hmanga tui pump-na siam niin, environment chhe zel tur ven na’n leh sum tam tak luangral tur humna’n a tangkai hle tih sawi a ni.
Aizawl district-a school leh Anganwadi Centre bakah biak in leh community hall hrang hrangah tui connection pek a ni a. School leh Anganwadi bikah hian zaah za connection pek an ni tawh.
Chak lehzuala Water and Sanitation Mission kalpui a nih theihna’n ‘Mission Zotuithiang’ neih nise, tiin rel a ni a. He Mission hnuaia hmalak dan duang turin PHE senior EE H Lallianmawia kaihhruaina hnuaiah Sub Committee din an rel. Khaw hrang hrangah chin dan tha zawk inhrilh a, awmze nei zawka awareness campaign nei turin ruahmanna an siam a ni.