Aizawl FC an tawlhthlu

January 9, Ningani zan khan Rajiv Gandhi Stadium, Mualpuiah I League khelh a ni a. Inkhel hmuhnawm tak; goal sarih zet luhna inkhelah mualneitu Aizawl FC in 3-0 ngawta hma an hruaina an humhim zo lova, an mikhual Sreenidi Deccan lakah uiawm takin an tlawm.
I League season kal meka chetha lo Aizawl FC hian an mualah chak ngei tumin tan an khawh a, bul pawh an tan tha hle. Darkar khat an khelh tlin hmain goal thun ngawt an thun a. Goal an la chhuah loh bawk vangin point thum hmu ngei tura ngaih an ni. Point thum hmuh theihna hun tha tak an neih chu Juan Castañeda an dan zawh loh vangin suangtuah ramah a thamral zui ta a ni.
Inkhel tir lamah Aizwl FC leh Sreenidi Deccan te an inhnehtawk viau a, goal pawh a lut lawk thei lo. Darkar chanve chuang hret chhunga goal lut a awm theih loh hnuin minute 37-naah Lalbiakdika chuan hmahruaina goal a thun. An mualah goal thun hmasa zawk an nih vangin AFC an phur a, goal pawh an thun belh leh thuai. Lalbiakdika goal thun atanga minute ruk hnu lek; minute 43-naah Zothanpuia chuan goal a thun zui leh a, si hnih faia hmahruai chungin chawlhlawk an hmang.
Si hnih faia hmahruai tawh AFC hi chawlhlawk hnu lamah pawh an khel tha chhunzawm a, goal an thun belh leh thuai. Minute 58-naah Lalrinzuala chuan an goal thumna a thun a, an hmahruaina a tizau. An mualah ngei si thum fai ngawta hma an hruai vangin AFC dinhmun a tha viau tawh a, a hmuna inkhel entute an phur viau tawh bawk.
Mimualah si thum phur tawh mah se Hyderabad club Sreenidi Deccan an zam lova, an buai hek lo. An huaisen leh an thawhrim zar an zo va, hun tawp dawn hnaihah goal li ngawt an thun zawn. Table-ah pariatnaa awm mek Sreenidi Deccan tan hian Juan Castañeda chuan minute 69-naah goal thunin an si phurh a sut then a, he goal hian an team a fuih phur hle. Castaneda hian minute 75-naah goal a thun zui leh. An si phurh sut zawh ngei tumin thapui an thawh zui chiam a, an hlawhtling leh thuai. Hun tawp dawn hnaih minutte 83-naah William chuan goal thunin an si phurh a sut zo ta nge nge.
Goal thum ve ve an thun hnuin mikhual team Sreenidi Deccan an phur a, mualneitu Aizawl FC an zuaiin an chiai ve thung. Phurna namen lo tak nena inlan Sreenidi Deccan tan hian goal hnih thun tawh Juan Castañeda chuan minute 90+9-ah hattrick siamin, chakna goal a thun ta mai a. Mualpuiah inlehthalna lian tak thlengin, Aizawl FC chu an mikhual Juan lakah mak tak maiin an tlawm zui ta a ni.
An mualah an tlawm vangin Aizawl FC dinhmun a chhe leh zual a, khelh 7 atanga point 6 hmuin table hnuai ber dawttu an luah a, an hnuaia mi nen point phat chuahin an inthla mek nghe nghe a ni.