Australian Open tan a ni dawn

Tennis a inelna lian, kum khat chhunga Grand Slam khelh hmasak ber Australian Open 2025 chu January ni 12, Pathianni atangin khelh tan a ni dawn. Australian Open 2025-ah hian Novak Djokovic a champion thei ang em tih chu Tennis ngainatute hriat chak a ni.
Australian Open-ah hian mipa lama champion lai chu Jannik Sinner a ni a, 2025-ah pawh hian champion tura rinkai ber a ni leh dawn bawk. Hmeichhe lama champion lai chu Aryna Sabalenka a ni ve thung. Kum 2024 hmang tha tak Sinner hian Melbourne Park-ah hneh theih loh ang maia inlan a, vawi 10 lai champion tawh Novak Djokovic chu semi-final-ah rin aia awlsamin a hneh a. Grand Slam-ah a vawi khat nan a champion zui ta bawk. Australian Open-ah a champion hnuin kum tawp lamah US Open-ah a champion zui leh a, Grand Slam title pahnih nen kum a khar. Grand Slam pahniha a champion bakah Tennis a inelna ngaihhlut hlawh tak ATP Finals-ah a champion a, a vawi khat nan World No. 1 ni chungin kum a khar nghe nghe. Sinner hian thiamna ril a nei a, thahrui a nghahin a tlo em em bawk a, player tha ber a ni mek.
World No. 1 Sinner leh tualchhung tlangval Alex de Minaur te quarter-final-ah an inhmachhawn thei dawn. Quarter-final an thleng ve ve a nih chuan inkhel hmuhnawm tak an lantir ngei a rinawm. Sinner awmna lamah hian Taylor Fritz leh Daniel Medvedev te an awm bawk a. Anni pahnih hi Sinner kawng dal thei tur zinga rinkai zual an ni.
Australian Open-a champion ngun ber leh Grand Slam-a champion ngun ber ni tel bawk Novak Djokovic tan kum 2024 kha kum tha a ni lova, Grand Slam-ah a champion belh miah lo. Grand Slam-ah a champion loh kumin a la champion ngai lohna Olympic-ah a vawi khat nan a champion nawlh thung. Djokovic hi kum tharah a insiamtha thei dawn em tih chu Tennis ngainatute hriat chak a ni a, Australian Open-a a chetla hmuh a chakawm tawh hle. Ngai a awh a, a ropuina thin Australian Open-ah a champion thei a nih chuan Tennis player awm tawh zawng zawng zingah Grand Slam-a vawi 25 champion tling hmasa ber a ni ang a, record ropui a siam ang. A champion a nih ngat chuan inelna lian title 100 a la tling chiah dawn bawk.
Novak Djokovic hi tunlaia player tha ber zinga mi Carlos Alcaraz nen group khatah an awm tlang a, quarter-final-ah inhmachhawn thei dinhmunah an ding. Quarter-final-ah Alcaraz nen an inhmachhawn a nih ngat chuan final ai pawha hmuhnawm zawk a ni thei hial ang. Alcaraz hian Australian Open 22025 inbuatsaihna lamah tualchhung tlangval Alex de Minaur a hneh lo naa inelna tak takah erawh chuan player tlo tak a ni leh ngei ang.
Australian Open :
Kum khata Grand Slam khelh hmasak ber Australian Open hi kum 1905, November thla khan khelh tan a ni a, hun eng emaw chen chhung chu Grass Court-ah khelh thin a ni a. Kum 1988 atang khan Hard Court ah khelh tan niin, tun thlengin Hard Court hman zui a la ni ta reng. Melbourne, khawpuia ‘Melbourne Park’-ah Tennis khawmpui lian nghah thin a ni a. Tuna an chhuat phah hman mek hi ‘Green Set’ niin, kum 2020 atang khan an hmang tan. Australian Open hi kum thar tir January thla chawhnu lam atangin khelh tan thin a ni.
“Happy Slam” / “the Grand Slam of Asia/Pacific” tia koh ni thin bawk ‘Australian Open’ ah hian vawi sawm champion tawh Novak Djokovic chu mipa lamah champion ngun ber a ni a. Hmeichhe lamah vawi sarih ve ve champion tawh Margaret Court (Amateur Era) leh Serena Williams (Open era) te chu champion ngun ber an ni ve thung. Australian Open-ah hian kum 2023 khan lawmman (prize money) Australian Dollar 75,000,000 sem ral a ni a. Kum 2024 khan lawmman tihpun a ni a, lawmman a sem ral zawng zawng hi 96.5m Australian dollars (£48m) zet a ni.
Australian Open 2025 ah India ramah chuan Sony LIV channel ah live in en theih a ni ang.