Aizawl tui lakna tlawh

Aizawl tui lakna tlawh
Aizawl tui lakna, Aizawl Greater Water Supply Scheme Phase-II chu PC party hruaituten an tlawh.
Tunlaiin Aizawl veng hrang hrangah PHE tui sem a mumal loh avangin Aizawl khawpuia chengten tuia harsatna namen lo kan tâwk chho leh mek tih PC party chuan sawiin, veiawm an ti takzet tih sawiin, GAWSS Phase-II Dihmunzawl lamah harsatna a awm nge, tih hriat duhin April 26 khan PC hruaitute hi an president Vanlalruata hoin a hmunah an enfiah.
An enfiahnaah Tlawng tui kang vanga harsatna emaw tui pump chhuahna tura hmanrua – khawl leh kawlphetha lamah emaw engmah buaina a awm lo tih an hmuh thu te, Aizawla chengten tuia harsatna kan tawh loh na’n Tuikhuahtlanga tuizemah darkar 24 chhung tuia supply reng zawk tih an hmu thu an sawi a ni.
Hetihlaia Aizawl khawpuia chengten PHE tui sem kan dawng mumal thei si lo chu, a semtute inthlahdah vang emaw sem dan mumal loh vang nge, remchemna leh mipui venthawnna nei miah loa VIP-ten an pumbilh zawk, tih chu PC party zawhna a ni tih an sawi.
‘Tun atang chuan, engmah dang chhuanlam siam loa, a rang thei ang bera Aizawl khawpui leh a chhehvela chengte, a hun tak leh pangngai taka tui in tur sem chhunzawm nghal turin sawrkar kan ngen a ni,’ PC thuchhuah chuan a ti.