Aizawlah Constitution Day hmang

On Nov 27, 2025 4 0

Aizawlah Constitution Day hmang
India ramin ama puala danpui duan hman theih tura a pawmna ni, ‘Constitution Day – Samvidhan Diwas’ chu Nilaini khan India ram pumah lawm a ni a. Gauhati High Court Aizawl Bench pawhin a hmang.
Hmanpuitu larsap Gen. Vijay Kumar Singh (Retd) chuan November 29 chu India Danpui hman theih tura pawmna ni a nih piah lamah a hlutna, hmathlir tha tak leh tun thlenga a la pawimawh zia lantirna hun a ni tih a sawi a. Kan ram danpui kaihhruaina hnuaia tun hun thleng thei tura India zinkawng chu ropui a tih thu sawiin, Gauhati High Court Aizawl Bench pawhin Mizoram mipui dikna leh chanvo humhim turin danpui hnuaiah mawhphurhna pawimawh tak a nei tih a sawi a ni.
Mipuiin dan an hriatchianna atana Legal Aids Clinic kalpui a ni thin chu lawmawm tiin, zirlai, thalai, hmeichhia, rethei zawk, thingtlang kilkhawr zawka awm, rualbanlo leh pawikhawihna tuartute thleng phaka uar zawka kalpui turin a sawm a. India danpuiin dikna leh chanvo min pek rualin, kan tih ve tur mawhphurhna – fundamental duties min pe tel a, a pahniha kalkawp tir thiam a tul tih a sawi bawk
Gauhati High Court judge Justice Marli Vankung chuan tha taka fundamental duties hlen chu mitin mawhphurhna a ni a, fundamental rights ang thoa pawimawh a ni, tiin, dikna leh chanvo lam chauh hriaa mawhphurhna lam ngaihthah chu felhlel a tih thu a sawi a. Kan chanvo leh dikna bakah danpuiin mawhphurhna min pek kan zawm that phawt chuan kan rama harsatna tam tak kan pumpelh thei dawn tih a sawi a ni.
Gauhati High Court judge dang Justice Kaushik Goswami pawhin Preamble pawimawhna sawiin, preamble ken tel thil pali – Justice, Liberty, Equality leh Fraternity chu ziaka awm mai loa, a taka kalpui a tul tih a sawi a ni.
British laka India-in zalenna a hmuh khan, India chuan ama pual danpui (constitution) siam tur member 299 awmna, Constituent Assembly a din a. Danpui an duante remkhawm leh siamrem hna thawk turin 1947 August 29 khan ‘Father of Indian Constitution’ tia hriat zui tak, Dr BR Ambedkar kaihhruaiin Drafting Committee din a ni. 1949 November 26-a Constituent Assembly thukhawm chuan India danpui siam chu lungrual takin a pawm a. 1950 January 26-ah danpui hi hman tan a ni.
Hun hmanah hian Aizawl District Court hotute, Law & Judicial department hotute, a kaihhnawih sawrkar offical dangte leh dan hremite an tel a ni.