Aizawlah PYF inkhawmpui nei

Aizawlah PYF inkhawmpui nei
Presbyerian Church of India hnuaia thalai pawl intelkhawmna, Presbyterian Youth Fellowship (PYF) chuan October 2-5 chhung khan Aizawlah Biennial Conference vawi 25-na an hmang a, PYF kum 50 tlin, Golden Jubilee an lawm nghal.
Inkhawmpui hi Central KTP Mizoram Synod chuan Youth Recreation Centre (YRC) Falkland-ah a thleng a, thupuiah “The Lord Has Done Great Things for Us” (Psalms 126:3) tih hman a ni. CHT (Cachar Hills Tribe) Synod Rev. Lalchawiliana Varte, Mizoram Synod executive secretary i/c Central KTP Rev. Dr. Rosiamliana Tochhawng, JRTC ( John Roberts Theological College) Shillong principal Rev Dr BL Nongbri leh PCI moderator hlui Rev D C Haia ten thupui an sawi a. Pathianni zan inkhawmah PYF leader kal chhuak Rev SC Diengngan chuan thu a sawi a ni.
October 3 chawhma dar 10.00 atanga tlai dar 4.00 thleng Thuampui Venglai Presbyterian Kohhran biak inah ro rel a ni a. October 4 (Inrinni) nilengin Golden Jubilee lawmna hun hman niin, zanah Jubilee mei det a ni/ October 5 (Pathianni) zing dar 8.00-ah Lalpa Zanriah Sakramen buatsaih a ni a, nileng leh zanah vantlang Pathian biak inkhawm neih a ni.