Campaign-naa PWD minister thusawi dan invaunaah an ngai

Campaign-naa PWD minister
thusawi dan invaunaah an ngai
Dampa bial by election neih tura ZPM candidate tana campaign minister Vanlalhlana thusawi dan chu invauna a ni tih political party pathum chuan an sawi.
MNF official candidate Dr R Lalthangliana chuan, kalphung thar tha zawk leh mipui sawrkar siam tura an intiam nasat hle laiin, PWD minister-in a campaign-naah Dampa bial mipui a vau tih a sawi a. “Bial hmasawnna tura hmachhawp mek, Pukzing leh Silsuri inkar kawng, NESIDs sum atanga a siamna tur awm sa leh siam tum mek pawh ZPM candidate a tlin loh chuan ngaihtuah nawn leh a ngai ang, tia a sawi hi Dampa bial mipui hmuhsitna leh tham lohnaah ka ngai a, sawrkar thuneihna hmanga mipui rahbehna lian tak a ni. Hetiang hi democracy rama thil thleng atan thil tih chi loh tawp a ni a, mipui inchungtlaka invauna tawngkam hmang tawh lo turin sawrkar ka ngen a ni,” a ti.
He lai kawng hi a hmunah tunhnai khan a tlawh a. 4×4 pik-up truck pawh chhuk zawnga kal hleihtheih loh khawpa chhe nasa a ni tih MNF hruaitu hian a sawi a. Henglai vela cheng, khawsak harsa zawkte ei bar chawkluhna ber, a bikin damloh nikhuaah inphurh kual changin damlote an lainatawm takzet tih a sawi. “Pu Lalrintluanga Sailo pawh khan MNF sawrkar lai atang tawha a vei leh ngaihpawimawh em em a ni a, tunah a hlawhtlinna a lo thleng dawn ta cheng a, a lawmawm tehreng nen, sawrkar hian ngaihpawimawh hmasak berah nei ngei rawh se,” a ti.
Minister meuhin hetiang thu a sawi chu tak tak a ni dawn em ni, tia a ngaihtuah laiin, a video hmuh tur a lo awm bawk si chu mak a tih hle tih Dr R Lalthangliana hian a sawi bawk.
AAPMizoram chuan Dampa bial MLA by election neih tur chu dan hnuaiah dik taka kal tura an beisei laiin, tunhnaia cabinet minister Pu Vanlalhlana’n Dampa bial mipui vauna a chhakchhuak leh chu pawi an ti a, na takin an dem tih a sawi.
‘PWD minister hian Phuldungsei khuaa a thusawinaah North East Special Infrastructure Development Scheme (NESIDS) hnuaiahPukzing leh Silsury kawng, truck kal theihna a siam tura awm vek tawh , ZPM candidate Pu Vanlalsailova a tling lo a nih chuan ngaituah nawn a ngai leh tur anga sawiin Dampa bial mipui rilru a tichiai a, hei hian The Representation of the People Act 1951 leh model code of conduct chiang takin a kalh a. India Constitution hnuaia Article 19 (1) (a) a tiderthawng bawk a ni,’ a ti.
Minister chu mipui leh dan hmaa thupha a chawi lo a nih chuan, mipui thlavang hauhna atan leh a dan bawhchhiatnaa hrem ngei a nih theihnan hma an la dawn tih AAP Mizoram hian a sawi a. PWD minister chu hetianga dan bawhchhiaa a hun khawhral loa, Mizoram hmun hrang hranga kawng chhe em em mek siamtha thuai zawk turin an chah tih a sawi bawk.
PC party thuchhuak chuan, Phuldungsei-a PWD minister Vanlalhlana’n Vanlalsailova thlantlin a nih loha Pukzing leh Silsury inkar kawng laihna tur ngaituah nawn ngai tura a sawi chu tha an ti loin an dem hle tih a sawi. ‘PWD minister thusawi video darhah minister hian Pukzing leh Silsury inkar kawng, truck kal theiha laihna tur, pawisa pawh NESIDS atanga a awm vek tawh thu sawi a, Dampa bial by-election a ZPM candidate thlan tlin a nih loh chuan ngaihtuah nawn a ngai maithei niin a sawi a, a thusawi ngaithlatute sawrkar thiltihtheihna hmanga a vau hi a tha lo kan ti a. Kan dem hle a ni,’ a ti. Hemi chungchang hi an zirchiang anga, a tul angin hma an la zui dawn tih a sawi a ni.