Minister pahnihin check gate an tlawh

Minister pahnihin check gate an tlawh
State pawna programme hmanpuia chhuak Home minister K Sapdanga leh Excise & Narcotics minister Lalnghinglova Hmar chuan an haw lamah Vairengte-a an department enkawl check gate chu a hrang ve ve in an tlawh.
Home minister hian Vairengte-a Police Check Gate a tlawhnaah an hnathawh dan phung, an hmanraw neih leh thawktu awm dan a enpui a. Inner line permit nei leh nei lo an lo enfiah dan bakah dan phal loh thil ve kawnga hna an thawh dan a zawt bawk.
Zawhna an chhan danin Vairengte Police check gate thawktute chuan, tun thlengin dan loa luh tum Bangladesh lam mi man chhuah emaw rinhlelh emaw an la nei loa, theihtawp chhuahin uluk takin an vil ve reng tih an sawi. Check gate bikah erawh thawktu an indaih lo deuh a, an kal thei hram hram rih thung tih an sawi a ni.
Excise & Narcotics minister-in Vairengte-a Excise Check Gate a tlawhnaah tunhnaia an hmasawnna chu lawmawm a tih thu sawiin fimkhur leh taima zual turin a chah.
Tunhnaiah Excise & Narcotics-a thawkte thahnemngaihna azarah ruihhlo man a pung a, Vairengte Check Gate a thawkte pawh an thawhrimna leh hmasawnna lawmawm a tih thu a sawi. Sawrkarin Excise & Narcotics Department a ngaipawimawh tih sawiin, kum 2024 chhungin district thar pathum – Saitual, Khawzawl leh Hnahthialah Excise Station hawn thar a ni a. Department chak lehzualna atan post thar 12 siam niin, thawktu indaih lohna phuhru turin direct recruitment hmangin mi 16 lak an ni tawh a, midang 33 lakna tur a kal mek bawk tih a sawi a ni.
Ruihhlo do kawnga pawimawh tak lirthei 18 (LMV 14 leh two wheeler 4) lei thar a nih bakah LMV hman mek pathum chu Mizoram sawrkarin a pe tih a sawi a ni.
Tunah hian Excise & Narcotics Station Vairengte-ah hian inspector pakhat, sub inspector pahnih, head constable pahnih, wireless operator pahnih leh constable 11 an awm mek.