Aizawlah Vohbik Kutpui hmang

Aizawlah Vohbik Kutpui hmang
District Election Office Aizawl buatsaih ‘Vohbik Kutpui’ chu Ningani khan Aizawl Lammualah hman a ni.
A hawnna hmanpuitu Social Welfare minister Er Lalrinawma chuan vohbikte hmakhua ngai a, ram rorelna leh khawtlangah dinhmun pawimawh tak chelhtu an nih thu hriattirna programme buatsaih a ni chu lawmawm a tih thu a sawi a. Mizo Kut dangte angin Vohbik Kut pawh kumtina hman thin tura ruahman nise tha a tih thu a sawi. “India ramah a te ber atanga a lian ber thlenga hlim taka kan awm hi kan chanvo a ni a, he programme hian mipui rilruah vohbikte thlir danah hmasawnna thar a thlen ka beisei a ni,” a ti.
Vote thlak chu mihring dikna chanvo a ni, tiin, khua leh tui kum tling tawhte chuan vote thlak chu mitinte chanvo a nih angin, ngaipawimawh turin a ngen tih a sawi bawk.
Rualbanlote dawmkanna lama thawk thate chawimawina, ‘State Award for the Welfare of Persons with Disabilities’ dawng tawhtu Chhingpuii pawhin thu sawiin, rualbanloten inthlana vote an thlak ve theihna tur ngaipawimawha Kutpui buatsaih a ni chu lawmawm a tih thu sawiin, vote thlak kawngah vohbik nu leh pa leh chhungte chu vote thlakna hmun pan pui hram thin turin a ngen. Pathianin duh taka a siam, an tu leh fa, chhungte enkawl kawngah theihtawp chhuah a, an nih tur thleng phaa kaihruaitu ni theuh turin a chah.
Vohbik Kutpui hi hun thumah then a ni a, chawhma lamah rally neih niin, Vanapa Hall atangin Lammual thleng kawng zawh a ni. Hun hnihna Lammuala a neih hi district election officer, Aizawl bawrhsap Dr Lalhriatzuali Ralte chuan kaihruaiin, Epatha Special School, Shining Star School, Gilead Special School, Special Blind School, Redeem Garden leh Rephedim Home atangin zai leh lam, recitation leh item hrang hrang thlir ho a ni a, chawhnu ah intihhlimna hun hman a ni.