Mizoram Police hman tangkai tur technology thar insiamsiak dawn

Mizoram Police hman tangkai tur
technology thar insiamsiak dawn
Police hnathawh tanpuina ngaituah chhuak tura computer thiam rual zirlaite intihsiakna chu Ningani khan Aizawlah neih tan a ni a. Larsap Dr Hari Babu Kambhampati chuan a hawng.
Police Headquarters Arya Mess-a neih Hackathon (Hackadventure) hi Mizoram Police leh National Institute of Technology (NIT) Mizoram tangdun buatsaih a ni a. India ram hmun hrang hranga NIT zirlaite, Mizoram University, Govt. Zirtiri Residential Science College, NIELIT leh ICFAI University-a computer zirlaite chuan police-ten dan leh thupek an kenkawh kawnga harsatna an hmachhawnte an zirchiang anga, hemi behchhan hian smart policing atana technology tha ngaihtuah chhuah an tum dawn a ni.
Larsap chuan Mizoram Police-in dan leh thuphek kenkawh kawngah, ruihhlo do kawngah, hnuchhui kawngah, pawikhawihna chhuihchhuah kawngah, Aizawl leh khawpui danga lirthei veivak mumal taka kaihhruai kawngah leh thildangah hna ropui tak an thawk tih a sawi. NIT leh Mizoram Police-in computer thiam rual, zirlai hmabak eng tak neite tana ram venhimna kawnga thluak thawh tura chona an chhawpchhuak chu ngaihtuahna fing tak a ni, tiin, hei hian rah tha a chhuah a ring tih a sawi a ni.
Mizoram DGP Devesh Chandra Srivastava chuan Prime minister-in ram venhimna atana police-te technology thar ber bera thuamchak tura hma a lo lak tawh angin, India ramah smart policing hi chak taka kalpui a ni tih a sawi. Tunhnaiah cyber crime – sum chungchanga inbumna, mipat hmeichhiatna rawngkaia pawikhawihna, child pornography leh Dark web kaltlanga dan bawhchhiatna a hluar chho mek a; Mizoramah pawh cyber crime kaihhnawiah pawikhawihna a pung nasa tih a sawi.
Tun thlenga cyber crime kaihhnawiah case an ziahluh tawh chu 1033 niin, dan bawhchhia 54 man an ni tawh a, tunhnaiah mi 16 chu thiamloh chantir an ni.
NIT Mizoram registrar Dr Lalthanchami Sailo chuan Mizoram Police nen an thawhho dan, Hackathon a lo chhuah dan leh nakin zela police-te tha tichak tura NIT-in hmalak pui an inhuam thu a sawi a. India rama tech institute zinga tha ber bawl NIT Mizoramin a nei chu kan vannei tih sawiin, NIT pawhin Mizoram mipui tana thil tangkai turah ngaihtuahna sengin theihtawp a chhuah dawn tih a sawi a ni.
Hackathon hi April 27-29 chhung neih tur a ni a. Zirlaite hian dan leh thupek kengkawhtuten an nitin hnathawhah eng harsatna nge an hmachhawn thin, tih leh, cyber crime chungchang an zir ang. Heng an thil hmuh behchhan hian dan leh thupek kengkawhtute mamawh leh hman tangkai tur technology duanchhuah an tum dawn a ni. Intihsiak chhung hian Narcotics Control Bureau, Indian Cybercrime Coordination Centre, National Crime Records Bureau leh cyber security lama mithiamten an hriat tur an kawhhmuh dawn a ni.