Aizawlin Tui kan hnianghnar – Hman sen loh kan paih baw huau huau

K. Hmingthankaia

Aizawl city bus stand-a ding rei lutuk ka vei ang bawkin PHE tui sem laia veng hrang hranga tui baw nasa lutuk thin hi Pu PL Liandinga hian a vei em em a, a mangan thu leh a tihreh dan turte hi vawi tam a sawi tawh a, a changtu Minister leh Chief Minister thlengin a lo thlen tawh niin a sawi. Mahse, danglamna a la awm lo. Kei pawhin ka vei ve em em thova, a chang leh a thlate ka’n la leh ringawta, department lamte pawh a thuphung chuan ka hrilh tawh. Chanchinbu lamah pawh ka lo sawi ve tawh a ni.
Khing, city bus chungchang leh PHE tui baw chungchangte hi sawrkar hmasa lama tihdanglam kan beisei ngam loh chu tun ZPM sawrkarah hian beisei taka kan han sawi leh chiam pawhin, engmah awmzia a la awm leh ta chuang lo chu a ni a. Hetiang thil ropui lutuk lo, mahse, mipui hne-hnai tak ni si, chinfel harsa lutuk tur pawh nia lang lo pawh chingfel thei lo leh ngaihven duh miah lo sawrkar hi kan lo beisei ang chu a ni leh dawn chuang lo tih chu a lang chho zel dawn ta niin a lang. Tuna heng thuziakte hian awmzia a nei chuang lo a nih phei chuan, ‘dawn ta niin a lang’ ti lovin, ‘beisei a bo leh ta’ kan ti duh tawh hial ang chu.
Brig. |henphunga’n kan ram mamawh hmasa pawimawh tak tak nia a hriat thil paruk, ‘Six basic needs’ tia kan hriat te kha tihhlawhtlin tumin kha lam hawi ngar ngar khan kan sawrkar leh mipui hi kal ni ila chuan kan ziaawm tawh khawp ang le. Pu |hena ‘basic need’ aia la basic zawk, ni tina mipui hnehnai em em si thil pawimawh tak tak tih tur leh ngaihvena ngaihtuah tur, chinfel ngai, thil tih harsa lutuk tur ni si lo hi a la tam em em a ni.
Hmasawnna leh changkanna hi chu hniam te atanga a indawt te te a tan a ngai si a. Chutiang tur chuan hna thawktu pawh a hniam lam kan mamawh tam zawk hle a ni.
Tuna, Aizawla PHE tui sem, Pu PLa’n mi thenkhat sawi dan a sawi ang phei chuan mipui dawn tur zatve vel tur luang riral ziah pawh hi, sawrkar leh department hotu lian lamin an ngaihven duh loh bakah, a taka thawktu tur field worker indaih loh vang a ni a. Tin, eng department pawh, chung lama mite atanga presure awm loh vangin, a hniam lam thawk leh field worker ten mahnia thahnem ngaih tum lovin an inthlahdah thin a ni. Tui sem ni hian tui semtute chu khawimaw laiah phone an bih mai mai loh leh, nula thingpui dawrah emaw an titi mai mai thin. An tlem ang ang hian field-a thawktute hian thahnem ngai se, khawilai nge fel lo, tute nge enpui ngai leh hauh ngai, khawi lai nge off tur tihte hi ngaihven vat vat thin se la, chawplehchilha chinfel nghal theih loh pawh office lam hriattir zung zung thin bakah, bawhzui nghal zel ni se la chuan, thla ruk emaw, kum khat emaw hnu chuan kan ziaawm ngei ang. Mahse, engkima neitu rilru kan put duh loh tlatna hi kan thanmawhbawk a la ni zel si a.
Tuna ZPM sawrkar hian an sawrkar hma khan sawrkar hna lian lam lak tlema, hna hniam lam lak an duh niawm tak khan ka hria a. Kei pawhin chutianga ti tur chuan ka lo ngen tawh thin a, a sign-tu tur ringawt hna sang lam la tam lo tial tial a, combined competitive exam te hi kum tin ti tawh lovin, kum thum danah tal emaw tih ni tawh se, te ka lo ti ve vel a. Mahse, sawrkar hna sang lam lak chu a la bang chuang lova, kan uar sawt zawk em maw ni, an sawrkar hnu pawhin kum tin group A officer la turin combined competitive exam an la kalpui zel chu a ni a. Lal hmaa duh hi lal hnu chuan duh leh loh a lo awlin, lal hmaa tha tih leh ngaihpawimawh hi lal hnu chuan theihnghilh a awl a nih hi te ka ti ta a. Tin, lal hian at a lo awl hle a nih dawn hi te ka ti ta a ni.
Kan hotute hian an pen bo thui hmain hmana an rilru put fim tak ang kha pu lehin, TV-a nalh tak leh thawveng tak, awlsam taka thil ropui tak tak insawi khum leh, thil hawn leh khuallian nih vel hi ti tam tawh lovin, hniam tak atangin ngaihtuah leh sela kan damtlang zawk ngei ang.
Electrict lamte, tui lamte leh kawng lamte, faina lamahte hian, tuna kan awm dan ang ang pawha tun aia kan ziaawmna tur chuan, a sawia sawi tur leh a sign-tu tur lam ni lovin, a taka thawktu tur hnathawh kawr hatu tur kan mamawh tam zawk hle a nih hi. Hna sang lam thawkte chu an hlawh bakah a kaihhnawih mihring leh thil tam tak a hautak hle laiin, harsatna sukiangtu leh thawvenna thlentu leh hmasawnna thawktu tak tak zawk hna hniam lam thawktute chu an hautak lo zawk daih bawk si a. Kan hotute hi mipui thlawh khum lo zawnga an kal phawt chuan mipui thawvenna leh dam tlanna a lo awm chho zel mai ang.