AMC-a kan sawrkar chuan vawk vulh khapna dan kan ennawn ang – Lalnghinglova Hmar

AMC-a kan sawrkar chuan vawk
vulh khapna dan kan ennawn ang
– Lalnghinglova Hmar
Aizawl Municipal Corporation-a sawrkarna an chan chuan vawk vulh khapna dan awm mek chu an ennawn dawn tih ZPM hruaitu Lalnghinglova Hmar chuan a sawi.
Inrinnni zinga Khatla leh Bungkawn-a ZPM street campaign-ah vawk vulh khapna dan awm mek an ennawn tur thu hi ZPM adviser Lalnghinglova Hmar hian a sawi a. Aizawl khawpui chhunga local council hrang hrang nen inrawn tlangin, mipuiin awlsam zawka AMC an dawr theihnan khawpui chhung hmun hrang hrangah help desk an dah dawn tih a sawi bawk.
Tih theih loh tur manifesto an duang ve loa, Mizoram sawrkar policy nena inhnerem leh kalkawp thei tur uluk takin an buatsaih a, Aizawl khawpui tihchangtlun chu an thupui ber a ni tih a sawi. Tourism-ah nasa takin Mizoram a thang mek a, nakinah chuan hnawksak tham mikhual an la rawn lut dawn tih sawiin, “Tourist-ten Mizoramah hun tam zawk an hman a, sum tam zawk an thlauh theihnan zan thum daih programme kan kalpui tan mek a; Sakawrhmuituai tlang, Hmuifang tlang, Durtlang, Reiek leh hmun dang dangah tourist hmunhma siamna tur sum thahnem tak kan dah,” a ti.
ZPM a sawrkar hnuah an intiam angin kalphung thar a thleng zel a, sawrkar hna lakah mumal taka kalpuiin a thiam leh tlingten hmun an chang ta a, dan loa aikal lak thin pawh tihtawp a ni tih minister hian a sawi a. Hetiang hian AMC-ah pawh eirukna zalenna AMC ni tawh lo, AMC tha zawk an din thei tih mipui an tiam tih a sawi. “AMC-ah sawrkarna kan chang a nih phawt chuan, Mizoram tha zawk kan siam mek angin AMC tha zawk mipui kan tiam a. Heng zawng zawng kan tihhlawhtlin theihnan ZPM AMC candidate kan thlantlin an ngai,” a ti.
Phunchawng Venga ZPM hun hmanah Aizawl West-I bialtu MLA TBC Lalvenchhunga pawhin, hmasawnna awmze nei, mipui nawlpuiin kan chhawr tlan theih tur, chak lehzuala thawh a nih theihnan ZPM candidate thlantlin a pawimawh hle tih a sawi a ni.