AMC-ah candidate kan duhtui – Dr R Lalthangliana

AMC-ah candidate kan duhtui
– Dr R Lalthangliana
Aizawl Municipal Corporation inthlan turah MNF party chuan candidate an duhtui bakah Aizawl khawpui hmasawnna atan rotling tam tak an thawh tawh avangin beiseina sang tak an nei tih MNF hruaitu Dr R Lalthangliana chuan a sawi.
Thawhtannia an party office-a inkhawmah MNF senior vice president Dr R Lalthangliana, MLA chuan, “Aizawl-ah mifing leh fel tak tak, thil awmze man thiam leh hria an tam a, ZPM sawrkarin bawl mai mai tum lo turin a chah tih a sawi a. State capital Aizawl atanga Thenzawla sawn tumna chu document hmuh tur nen a awm reng laiin, ‘Peace City’ tiin an sawi leh daih tih a sawi.
AMC inthlan chu ZPM-in an zuam vak lo nge, term zawh hnuah pawh corporator-te kut phuarsak siin inthlan hun an pawtsei niin a sawi. “Mipuiin oil kan leina chhiah chawi tlingkhawm hmangin kawng an cheitha a, hei hi tute tan pawha thil harsa lo, lemchanna chikhat a ni. AMC inthlan turah hian MNF-in candidate kan duhtui a, Aizawl khawpui hmasawnna atan hna tam tak, rotling kan lo thawh tawh avangin beiseina sang tak kan nei a ni,” a ti.
Mizoram budget pass tak aiin state leiba cheng vaibelchhe 2008.23 in a tam zawk tlat chu a hriat vawikhatna a ni tih MNF MLA hian a sawi a. Chief minister-in sum tamtak an hmuh thu leh an tihthat vanga lawmman tam tham tak an dawn thu a sawi reng laiin, SASCI-a sum hmuh turah Manipur-in vbch. 2400 a chan laiin, Mizoram-in vbch 100 chauh a chang lawi si tih a sawi bawk.
MNF sawrkar laia CM Pu Zoramthanga’n a ngaihpawimawh em em health care scheme an duanfel vek tawh, a taka an hman hman loh chu, chhun han pakhat pawh danglam mang loin ZPM-in MUCHS tiin an hmang tih Health minister hlui Dr R Lalthangliana hian a sawi a. “Kan hmalakna an chhunzawm thei leh kan ruahmansa leh kan sum hman bang an rochun thei hi a lawmawm hle. MNF hian ram rotling tak tak sawisen loh kan buaipui a, kan din tawh a, ZPM sawrkar hi kan kuhmumah an par a tih loh theih loh,” a ti.