AMC huamchinah ICCC hmang tan
Aizawl Smart City Limited hnuaia din Integrated Command & Control Centre (ICCC), a taka hman tanna, go-live chu Thawhtanni khan Treasury Square-a ICCC pisa-ah neih a ni.
He hun hmanpuitu deputy chief minister Tawnluia chuan Smart City Mission hi kum 8 kalta atang khan India ram puma khawpui 100 thlan chhuahah kalpui a ni tih a sawi a. Khawpui tih changtlun leh tihchangkan chu he mission tum ber niin, Smart City hnuaia khawpui thlan chhuah zinga tel tur chuan tehfung hrang hrang a awm a, Mizoram pawh kum 2018 khan pawm a ni a; Covid lengin kum 2 chhung min thutchilh avangin duh angin hma lak a chak loin thuanawp deuh mah se, theihtawpa chakin an kal mek tih a sawi a ni.
Aizawl khawpui thuammawia tih changkanna’n tun dinhmunah project 30 chuang kalpui mek a ni tih sawiin, “Smart City hnuaia hmalakna hi kum 5 chhunga zawh fel tur tih a nih laiin, Covid avangin kum khat dang pawhsei a ni a, nakuma zawh hman tumin nasa takin kalpui mek a ni,” a ti.
Smart City chuan hmasawnna changkang leh tluantling, mipui chhawr tangkai tur ni bawk chu an thupui ber a ni tih deputy chief minister hian a sawi a. A taka hman theih tak ICCC chu mipui tan a tangkai dawn a, a bikin information pawimawh hriat zung zung theihna a nih bakah pawikhawihtute hnuchhuina leh traffic dan kenkawh kawngah a tangkai dawn hle tih a sawi a ni.
-- Advertisement --
# Integrated Command & Control Centre hi a project atana ruahman chu cheng vaibelchhe 117.98 a ni a. 2020 March 7 khan contract agreement ziah a ni.
# ICCC-ah hian control room, conference room, reception area, operator room leh data centre changkang leh changtlung tak a awm.
# He project hnuaiah hian Aizawl Municipal huamchhunga cheng vantlang mipui tana a thlawna hman theih tur wifi hmun 15-ah bun a ni a. Surveillance camera hmun 76 ah bun niin, fixed camera 236 bakah Pan Tilt Zoom (PTZ) 39 a awm.
# Khawpui kawtchhuah pawimawh hmun 14-ah automatic number plate recognition (ANPR) camera dah a ni a, facial recognition system khawpui chhung hmun pawimawh 5-ah leh khawpui chhung hmun 4-ah environmental sensor dah a ni.
# Bawlhhlawh paih lirthei 140-te monitor-na tur GPS hmang Solid Waste Management Application Dashboard bakah Aizawl khawchhung chanchin hriat zung zung theihna – variable messaging display hmun 4-ah dah a ni.