Candidate ni thei tur rel fel thei hmasa ber party kan ni – B Lalchhanzova, PAC member

An tumah an chian avang leh an hnung leh hmaa awm mipuiin an tawiawm that avangin MLA inthlan hmachhawn turin mumal taka candidate ni thei tur, rel fel thei hmasa ber party an ni tih ZPM Political Affairs Committee member B Lalchhanzova chuan a sawi.
Thawhtannia ZPM office-a inkhawmah B Lalchhanzova chuan kawng hrang hrangin ZPM kal lai tihbuai tumin ruling party-in an bei a, an tumah kan chian em avang leh an hnung leh hmaa awm mipuiin an tawiawm that em avangin kumin MLA inthlan hmachhawn thei turin mumal taka candidate ni thei tur rel fel thei hmasa ber party an lo ni ta hial, tiin a sawi.
Kum 2018 inthlanah bial tam zawkah ding tur inhmu zo meuh loin, tlawmngaih chhuaha ding an ni fur a. Beiseina nen ram tan an penchhuak a, vawiin thlengin Pathian kaihhruaina an dawng nasa hle tih a sawi. “He party hi tobul mumal tak neia indin, Zoram chhung leh pawna Zoram thatna veitute sualchhuah leh tawngtai chhuah a ni. A indin chhohnaah neitu leh dintu nia inngai kan tam em em a, Zoram pawna Mizote pawhin an vei chhuah niin an hria a, ram vei tawngtai miten an tawngtai chhuah niin an hria a, ram chhunga thil tha duh langsar lem loa intelkhawm thinte pawhin an beisei ruk pawl ding taah an ngai bawk. A tobul atang rengin mipui ta, neitu ngah a nih avangin movement party tia hriat kan lo ni chho ta zel a ni,” a ti.
Party inrelbawl danah beih an tawk nasa a, Congress leh MNF ten an party inrelbawl dan atangin an teh a, tlawn rawn tur lal em em mi pakhat an siam thin ang bak chu party inrelbawlnaah awm theiin an ring loa, ZPM party chu ‘hotu ngah, thu ber pawh awm lo’ tiin an puh ta tih ZPM PAC member hian a sawi.
ZPM chuan an rorel dan phungah ‘thuneihna sem zai’ chu a takin an hmang ngam a, mi pakhat rorelna angin an kal ve loa, an kal dan chu party dang tan chuan hman thiam ve chi a ni lo tih sawiin, “Inchhitral ngamna atang lo chuan hman ngam chi a ni lo. Keini chuan kan kal dan hi kan hmang ngam a, kan ram tan a tha ber rihin kan hria a, zawngchhang thlak pawh kan ti hle. Mi thenkhatin ZPM chu thunei an tam lutuk a, sawrkar pawh nise, an buai ang, ti tein min sawi thin. Sawrkar hma leh sawrkar hnu kal dan turah buaina tur a awm lo. Chief minister viak tha tak Pu Lalduhoma kan nei dawn a, sawrkar enkawl hna chu CM leh a thawhpuite kut tur a ni a, party administration nen a hranga kal tur a ni,” a ti.
An party policy chu central atanga state-in kan sum dawnte hmanchhuahna atan chauha an policy hming hi siam an nih loh thu te, hmasawnna daihrei leh tlo, tuchhuan la awm zel turte chhawm tlak Zoram siam tumna atangin Sustainable Development & Reform Policy an siam thu te ZPM hruaitu hian a sawi. “Term khat emaw term hnih emaw chauh daih hmasawnna hi kan aupui ve loa, kum 100 lokal leh tur daih, Zo hnam thisen piang zel turte tana chhawm theih hmasawnna lungphum phum hi kan tum ber a ni,” a ti.