AMC sum an hman danah MNF a insawifiah a ngai – ZPM Thalai

Aizawl Municipal Corporation-a rorel lai MNF party-in Aizawl khawpui tih hmasawnna tur sum, hmasawnna tur hna aiah party invulhna leh anmahni hamthatna atana an hman chungchangah anmahni thlangtlingtu mipui hmaah an insawifiah ngam lo a nih chuan AMC inthlan leh by election-ah mipui fiahna paltlang a harsa hle turah an ngai tih ZPM Thalai chuan an sawi.
ZPM Thalai Hqrs. thuchhuak chuan, kum 2023- 2024 chhunga property tax tlingkhawm atanga cheng vaibelchhe 1.95 a hmanna hriat loha a awm chu mipui tham lohna lian takah a ngai a, hmasawnna tur leh khua leh tui tha rilru pu chunga mipuiin chhiah pek an remtih em em laiin, a hmanna hriat lohin chhiah pek tlingkhawm heti zat a luangral leh si tih a sawi.
Bawlhhlawh halralna khawl cheng vbch 2.74 man, darkar 24 chhunga bawlhhlawh ton 10 halral thei tura ngaihin ton 1 pawh a halral thei lote, a hnu reiloteah hman loha dahtawl leh mai mai a ni te chu MNF sawrkar vanglaia police mawza man to leh ek in kal thei ang maia sum siamnaah ZPM Thalai chuan a ngai tih a sawi a. AMC-ah MNF-in thuneihna a chan, 2021 -2024 chhunga an party mi leh sate vulhna atana cheng vbch 30.92 chuang man hna, khawpui tih hmasawnna tur pawh ni lo, party invulhna atana hna tenau an siamchawp pawh thuneihna hmansualna lian takah a ngai tih a sawi a ni.
‘Mizoram khawpui ber, Aizawlin hma a sawn ve theihna tura ruahmanna awmte, kum thum chhunga mumang ang maia a thamral leh ta mai hi a pawi kan ti a, khawpui hmangaihtu dik tak thlangchhuak turin mipui rilru a insiam mek a ni,’ a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More