MLA-in sawrkar hmalakna enzui

South Tuipui bialtu MLA Jeje Lalpekhlua chuan Hnahthial khawchhunga sawrkar department hmalakna leh hnathawh hrang hrang – bawrhsap pisa panna kawng siamthara tui luankawr siam dan tur, bawhhlawh paih lailawkna hmun, kawrpui siam ngai leh PHE-in Rallang Tlanga tui dahkhawlna an siam mek chu Thawhlehni zing khan a hmunah a tlawh.
MLA chuan Hnahthial bawrhsap pisa panna kawng SASCI sum hmanga siam zawh tawh, tui luankawr (side drain) siam hmabak a tlawh a, tui luankawr siam a nih theih nan leh retaining wall rem a nih theih nan hma lak thuai a tum tih a sawi. Bawlhhlawh sawngbawlna thar tur Haulawng kawng ami chu siam zawh thuai a nih theih nan chak taka bawhzui a tum thu a sawi. Hnahthial Electric Venga kawr pui, a bula in awmte tana hlauhthawn awm pawh enfiahin UD&PA lama hma lak a nih tur thu a sawi bawk.
Thawhlehni khan Hnahthiala MLA office-ah Jeje Lalpekhlua hi thu in, chawhma lamah khaw pawn atanga amah dawr duhte tan hun a hawng a, chawhnu ah Hnahthiala amah dawr duhte tan hun a hawng leh a ni.