American company thlaah inkap kai
American company chuan history siamin Thlaa spacecraft tum tir thei hmasa ber company an ni a. Houston a inbun Intuitive Machines chuan an Odysseus robet chu lunar south pole ah hlawhtling takin an tum tir a ni.
“Rinhlelh rual loha kan sawi chian theih tak chu kan hmanrua chu Thlaah a tum ta a, signal min pe mek a ni” tiin flight director Tim Crain chuan a sawi a. Company staff te chu an hlim hle.
Space commercial exploitation chauh pawh ni lo a nawlpuia US space programme atan hun pawimawh taka ngaih a ni a.
Tihian Intuitive Machines chuan Moon surface-a kum sawm nga chuang US inhnamhnawih tawh lohna chu a thai chhe ta bawk a. US inhnamhnawih hnuhnun ber chu kum 1972-a Apollo mission kha a ni.
US space agancy Nasa chuan Odyesseus-ah hian scientific instrument paruk dah nan room a lei a, Nasa administrator Bill Nelson chuan Intuitive Machines te hlawhtlinna chu ‘hnehna’ tiin a sawi.
“US chu thlaah a lo let leh ta” tia sawiin, “Vawiin hian a tum khat nan commercial company, American company chu thlaah a inkapkai a ni,” tiin a sawi.
Controller te chuan thlaa tum dawn hnaihah harsatna nasa tak an tawk a. Odyesseus ranging laser, craft altitude leh velocity calculate tu tur chu a thawk hleithei lo va. Mahse, vanneihthlak takin a chhunga Nasa te laser hmangin engineer te chuan an siam rem thei ta a ni.
Odysseus a tum hnuah pawh signal a pechhuak mai lo va, mahse a hnuah communication link chu a rawn pe chhuak ta a ni.
Odysseus tumna hi 5km a sang tlang Malapert tih bul lawkah niin thlaa a chhim tawp lai a ni bawk a. A tumna hmun hi Nasa-in Artemis programme hmanga astronauts tirh luh nana a hual a ni bawk.
Heng lai hmunah hian khuar thuk pui pui hi hmuh ngai miah loh a awm bawk a, scientists te chuan heng khuar chhungah hian vur tui khang awm theiah an ngai a ni.
“Vur a pawimawh takzet a, Thlaa vur awm te hi kan hmang tangkai thei a ni” tiin Lori Glaze, Nasa’s director of planetary science chuan a sawi a.
“Vur chu tuiah kan let thei a, in tlak tuiah siam theih a ni a, chu mai bakah oxygen leh hydrogen te astronauts te hip turin kan siam thei bawk a ni,” tiin Lori Glaze chuan a sawi.