Amritpal Singh Assam Jail ah dah dawn

Punjab sorkar chuan pro-Khalistan propagator Amritpal Singh chu Assam jail-a tang tura thawn a remti a, Punjab atanga 2,600 km laia hlaah Centre thurawn angin dah a ni dawn ta tiin senior government official chuan a sawi.
He thutlukna siamna chhan hi Punjab emaw Haryana lung inah emaw dah a nih chuan jail atanga tlanchhuah thut theihna laka himna tur tia sawi a ni.
Singh, chief of Waris Punjab De (heirs of Punjab) hi National Security Act (NSA) hmanga man niin Assam-a Dibrugarh Central Prison ah tlawhpawh theihloha dah a ni ang. Singh a thuihruai midang pakua tun hnai ni 35 inkar chhunga man te pawh Dibrugarh jail-ah khung an ni bawk ang a, cell hranah vek dan an ni ang, tiin official te chuan an sawi bawk.
NSA Act hmangin Singh hi thuneitute chuan a tul a nih chuan executive order hmangin kum khat pawh an kawl thei a. Singh hian thubuai dang criminal case paruk lai a nei tel bawk.
“Singh hi Punjab-a lung inah dah ni se chuan dan leh hrai lekkawhna lamah harsatna awm hial thei a ni a. Lung in tang dangte fuihpawrh thei emaw leh tlanchhuak tura ruahmanna pawh siam thei a ni,” tiin official te chuan an sawi bawk.
Assam state-a lung in tang tura thutlukna siamna chhanah hian Singh mai bakah a thuihruai te ama din ngei Anandpur Khalsa Fauj (AFK) mi leh sa awm nual te chu ngaithuah tel a ni bawk.
“Punjab bikah chuan international seperatist organisations tena an fund mi thekhat ten jail pawnah lungawilohna pawh an lantir thei” tiin official te chuan an sawi bawk.
Singh a thuihruai dang pakhat chu March 18 atang khan tlanboin a chin hriatlohin a la awm reng a, mahse, Punjab leh a chhehvelah bak a awm rin a ni lo thung.
Singh hi nikum atang khan thuneitute enthlaka awm reng tawh a ni a, nikum February 23 khan mipui thinrim te chu Sikh preacher kaihhruaiin Punjab a Ajnala police station luhchhuahin an zinga pakhat chu chhuah an lo phut tawh a. Lungawilote hian Sikh holy book Guru granth Shaib chu kengin hei vang hian police-te chuan silai an chelek duh loh phah a. Inbeih buainaah police parukin hliam an tuar a ni.