An kawppui leh laina hnaiten kum tin hmeichhia 137 that

An kawppui leh laina hnaiten kum tin hmeichhia 137 that
United Nations Office on Drugs & Crime (UNODC) chuan kum kal ta chhung khan an kawppuite emaw, an chhungten emaw ni tin hmeichhia 137 zet an that thin niin a tar lang.
Hmeichhiate thahna hmun atan hian an in chu an hmang nasa ber bawk niin an sawi a. Hmeichhe 87,000 zet nikum chhung khan an lamhnaite kuttuara thi hi an awm a, an zinga 30,000 vel hi an kawppuiten an tihhlum an ni a, 20,000 vel chu an lamhnai deuhte tihhlum a ni thung niin an sawi a. Heng aia tam daih hi a tak takah chuan a nih an ring bawk.
UN-in statistics a neihah hi ram tin sorkarin an ram chhunga tualthahna thleng a chhinchhiahna atanga lak khawm a ni a. UN statistics atang hian BBC 100 Women leh BBC Monitoring chuan ngun zawkin hmeichhiaten kut an tawrh dan hi a zir veleh chhawng a ni.
Kawppuite leh an laina hnaite kut tuar nasa hi Africa khawmualpuia hmeichhiate an ni tih UN report-ah hian a lang a. Hmeichhia 1,00,000 zelah hetiang avanga nunna chân hi 3.1 an awm niin an sawi. Asia khawmualpui chu a zat (number) zawnga kawppui leh chhungte kut tuara thi hmeichhia an tam berna a ni thung a. Nikum chhung khan hmeichhia 20,000 zet chu hetiang avang hian an thi a ni.
Tualthi hrim hrim erawh chu khawvel pumah mipa an tam zawk a. UNODC-in data a lakkhawmah hian mi kut tuara thi hi hmeichhia aiin mipa a let li velin an tam zawk tih hmuh theih a ni a. Tualthahna thleng 10 zela 8 chu a tuartu mipa an ni a. Hetih lai hian kawppuite kut tuara thi 10 zela 8 aia tam mah chu hmeichhia an ni thung a, nupa leh inngaihzawnna karah chuan a awmnem zawk chu an chan a chau zawk hle tih a lang thei. Asia khawmualpuiah chhungte leh kawppuite kut tuara thi hmeichhia an tam ber a, hmeichhia 20,000 zet an thi nia ngaih a ni bawk.