An khelmuala chak zo lo chunga last four lut Arsenal

An khelmuala chak zo lo chunga last four lut Arsenal
Nilaini zan Uefa Champions League quarter-final second leg match-ah Premier League hmahruaitu Arsenal chuan an mikhual Sporting CP lakah goal thun zo loin 0-0 draw bak pel zo lo mah se Portugal ram atanga 1-0 hnehna an lo hawn tawh hmangin khelh hnih belhkhawmah Kai Havertz-a goal awmchhun kha an chakpui a, semi-final match-ah Atletico Madrid an hmachhawn dawn.
Emirates Stadium inkhelah Mikel Arteta team khan beiseiawm takin bul tan mah se first half-a ball chang tam zawk an nihna chuan goal hlauhawm siamchhuah kawngah a pui teh chiam lo a, chawlhlawk hmaa goal thun teuh zawk chu Sporting an ni!
Francisco Trincao leh Pedro Goncalves-te’n mikhual team tana goal thun theihna hun remchang an bawhpelh bakah Arsenal goalkeeper David Raya ball pass sual chu home team tan a pawi thui hman teuh hle a; Sporting tan Geny Catamo pawhin Maxi Araujo siamsak atanga a ball tha hmuh chu goal ban petperna’n bak a hmang zo lo!
Gunners hi karliamta mai Premier League-ah Bournemouth hneh loin an talbuai hlimhlawt a, NIlaini zanah stadium chhunga London mipui ngaih a ngam thei lo a, engtin tin emaw first half chhungin an lama goal lut tur an dang thei hram!
Second half lamah pawh Portuguese-ho kha an la hlauhawm chhunzawm ta zel a, an chance tha ber neitu chu Araujo niin, penalty area chhung atanga a shot chu goal ban sirah a chhuak hlauh a; hun tawp dawnah substitute Leandro Trossard chuan mualneitu team chakna goal ni teuh tak a thun zo lo a, corner atanga ball chhuak chu goal ban a tauhper hlauh!
An khelmual hman thiamah north London club chak zo lo mah se first leg-a an goal khat thun hmangin last four an lut ta tho a; tun hi an club chanchina kum zawna Champions League semi-final vawi hnih an luhna chiah a ni.
Season liamta khan Arsenal hi semi-final stage-ah champion zui ta Paris St Germain hneh loin an tla a, kum 2006 final-a Barcelona an hneh loh tih loha Champions League final la thleng leh ngai ta lo English team hian a tum hnihna atana Europe final an beiseina kawngah team hlauhawm Atletico an paltlang a ngai dawn a, an tun dinhmun mek atang chuan La Liga club hi an huphurhawm deuh mai thei!
Arsenal manager zinga Europe club inelna sang bera kum zawna semi-final thlenpuitu hmasaber leh awmchhun ni ta Arteta chuan draw result nei chunga an tlang hnuah an tan zan ropui a nih thu leh an inkhel tawiawmtu fans chunga a lawm thu sawiin, kum 140 chhunga an tih theih ngai loh an nghakchhuak ta tih a tarlang tel.
Tualchhung league lama Arsenal hmahruaina chu Manchester City ral lian zel avangin a derthawng leh hle tawh a, hma hruai ve reng chunga season tawp lama talbuai ching laklawh Gunners hi inelna hrang hranga an match khelh hnuhnung vawi lia vawi thum tehreng tlawm tling an nih avangin Champions League semi-final luh kha an tan a pawimawh hlein a rinawm.
An boss Mikel Arteta khan tlarhma lama tlan chii pathum – Viktor Gyokeres, Noni Madueke leh Gabriel Martinelli-te a luhtir thawt a, awmzia a nei leh lem lo!
Arsenal hian kartawp Pathianniah title race-a an tana hlauhawm hnaivai ber Manchester City an hmachhawn dawn a, he inkhel hi Premier League hmahruaitu nih inchuhna a nih tawh dawn avangin kum 22 chhung tehreng England champion ni thei tawh lo Arteta team tan a pawimawh hle dawn a ni.
Portugal ram club lian Sporting pawhin Pathianni vek hian tualchhung league lamah Benfica an tum ve thung ang.