Season tawp ruala City chhuahsan tur Silva

Kum 2023-a Champions League trophy lakpuitu Manchester City captain Bernardo Silva chuan tun season tawp ruala a contract zawh hnuah inremna dang ziak zui tawh loin Premier League champion team a chhuahsan dawn tih a nemnghet.
Portugal midfielder kum 31 mi hian kum 2017 khan Monaco atangin City a zawm a, tun thlengin match 451-ah goal 76 thunin, assist tum 77 a siamchhuak tling tawh bawk.
Thla hmasa maia Carabao Cup a lakpui kha City thuam inbel chunga major title 15 a lakpui tlinna chiah niin, chu’ng zingah chuan 2022-23 season-a an Treble kha a tel.
Silva hian 2017-18 season-ah khan point 100 hmu tling chungin City chu Premier League title a lakpui a, kum 2021 leh 2024 chhung khan a zawnin league title pali a lakpui bawk.
Chuti ang mi chuan Instagram lamah City-a a hlawhtlinna chungchang tarchhuakin, “He team tana kan hlawhchuah tawh zozaite hi ka thinlungah a nung reng tawh ang a, point 100 kan hmuh tlin te, season khata tualchhung title pali kan lak leh a zawna tum li ngawt kan champion te, Treble leh a dang tamtakte kha a chhe thei lo,” a ti.
Silva hi City modern era atanga he team tana khel hnem zual player 10 zinga lang pha awmchhun niin, Mike Summerbee nen he club tana khel tam zual pariatna an ni dun mek.
Season liamtaa Kevin de Bruyne chhuah rual khan club captain-ah a kai chho a; season hnuhnung vawi riatah vawi ruk ngawt Premier League title a lakpui.
Blues hi league-ah pahnihna ni mekin, April ni 25 khian FA Cup semi-final matych pakhat zawkah Southampton an hmachhawn ang.