Daily Newspaper

An mualah Chelsea an tlawm

27

Pathianni zan khan English Premier League-ah inkhel ngaihven hlawh tak a awm a, player lei nana sum seng hnem Chelsea chuan an mualah champion lai “Liverpool an mikhual. Inkhel hmuhnawm leh boruak sang takin hi red card in a daidan a, mikhual team Liverpool in si hnih faiin hnehna an chang. Inkhel dangah Tottenham an insiamtha a, mikhual an nihna hmunah 5-2 in hnehna an chang.

Daidantu Red card
Stamford Bridge-ah champion lai Liverpool an leng lut tur hian manager pahnih Frank Lampard leh Jurgen Klopp te inkar a that loh vangin “ngaihven a hlawh leh zual. Chelsea hi player lei thar nasa, EPL club zinga bazara boruak nei lian ber an nih bawk vangin an chetla hmuh chak an tam a, hei hian Reds an hmachhawn tur boruak a chawk nung viau bawk. Ngahhlelh ang neiin inkhel hi a hmuhnawm a, chawlhlawk hmain an inhnehtawk viau bawk a, chawlhlawk dawn hnaiah Christensen hnawhchhuah a ni chuan boruak a thlak hlawk a, Chelsea in an mikhualte an ngam loh phah ta viau thung.

Inkhel tantirh phat atangin team inman leh inhrechiang Liverpool che vel a hmuhnawm a, an tuan a tha hlawm bawk si a, Chelsea an nawr tawm nghal tawk tawk. Ball chang tlem zawk leh tawm zawk ni bawk mahse Chelsea hian counter attack atangin hlauhawm an siamchhuak zauh zauh reng tho va, Reds tlar hnung thlamuangin an awm thei bik lo. Kepa chet fuh tawk loh vangin Liverpool hian goal an thun teuh hle a, Chelsea tlarhnung chet that vangin an him hram thung. Chawlhlawk dawn hnaih minute 45+1-ah Liverpool hian hlauhawm takin an nawr let phut a, Mane tlan fal tur chu Blues defender Andreas Christensen chuan ball tum hauh lovin a kuah thlu. Inkhel thununtu Paul Tierney chuan Christensen hi yellow card a pe hmasa zet a, VAR rawn a nih hnuin Red card a pe a, a hnawtchhuak leh ta zawk. Christensen hi a hnung bera ding a nih tawh vangin hnawhchhuah a ni hi thil tih ngei tur niin a lang.

Pakhata tam zawk Liverpool hian an khingpuite an ngam leh zual sauh a, Chelsea lam chan mualah an inkhel chawt a ni ber tawh. Mawi taka ball an inpek a, an in one-two hnuin Roberto Firmino chuan Mane tan tha zetin a chhawpsak a, player thawkrim leh tlanchak Sadio Mane hian mawi takin a tauh pial lut a, minute 50-naah hmahruaina goal a thun.

Goal khat an thun hnuin Liverpoo an hlauhawm sual sawt a, na takin an nawr zui. Minute 55-naah Si nghak sawisel hlawh tak Kepa a chesual a, Ball petchhuah a tumna lamah Mane a pet per ringawt a, Mane hian an goal hnihna atan chiang zetin a pet goal zui zat a, si hniha hma an hruaina goal a thun.

An mualah goal hnih an chhuah hnuin Blues in tan an khawh zui a, tlem zawk ni mahse huaisen takin an inlan, Hun tawp dawn hnaihah an si phurh sut then theihna hun tha an nei a, penalty an hlawhchhuah. Liverpool player thar Thiago Alcantara penalty chawi hi Jorginho chuan a pet a, Reds si nghak Allison-a’n tha zetin a lo dansak a, a team a chhan him. He goal hi lut se Chelsea hian phur tharna neiin point an hlawhchhuah zui hial an inbeisei dawn a, an beiseina a thlawn tak si vangin an hnual leh zual a, an mualah goal thun zo lovin uiawm takin an tlawm ta a ni. He inkhel hi chawlhlawk dawn thlengin inbuktawk thawkhat viau mahse red card hian a daidan a, chawlhlawk hnu lamah Reds an chungnung zui ta hle a ni.

Reds chak theihna turin Reds card hian kawngro su thui viau mahse an khel enin Liverpool hian byheart sa, nal takin a khel niin a lang a. Sipel chawpa khel a, la inzir chho zel Chelsea in an la khan lo deuh tih erawh hmuh hmaih theih a ni lo thung. He an inkar la zau rih tak hi Blues manager Frank Lampard pawhin a hai lova, hmasawn tuma inzir mek an ni a, team nghet leh inman tak dinchhuak tur chuan nghah hret an la mamawh a, hun an la mamawh thu a sawi ve bawk.

Fakhlawh Alcatara
Liverpool chuan Bayern Munich atangin midfielder thawnhriat ngah tak Thiago Alcantara an la lut thar a, Chelsea an hamchhan tum hian second half-ah an luhtir. An player thar hian penalty chawi nghal mahse a che ropuiin, fak a hlawh zui hle thung. Minute 45 chauh khel hman hram mahse ball vawi 75 zet a pass dik hman hial a, fak a hlawh tak zet a, a chet that dan hi hahipin an sawi zui nghal hlawm.

Fak hlawh lo Kepa
Si nghak man to, a manto ngaihtuaha chetha lo, chet sual ching tak Kepa Arrizabalaga chu Liverool an hmachhawn tum hian a chesual leh pek a, sawisel a hlawh hle. Liverpool an hmachhawn tum hian chawlhlawk hmain a possitioning dik loh vangin goal an chhuah tep a, minute 55-naah Mane a pet per vangin goal an chhuah zui ta nghe nghe a, an chak loh zui bawk vangin inkhel a zawh meuh chuan Kepa demna thu a ri leh nghal luai luai.

Chelsea manger Lampard chuan an si nghak Kepa chuan a tisual ngei tih a sawi a, Kepa ngei pawhin a tisual tih pha lo. Sawiselna a tawh nasat em em lai hian Lampard chuan thlawptu a mamawh hun lai tak a nih thu sawiin, inrintawkna an neih let leh theih nan an puih tur thu a sawi hlauh thung. Caraboa Cup lamah chuan Kepa hi an chhawr zui dawn lo ngei a, EPL lamah erawh an chhawr zui tura ngaih a ni thung, Chelea hian si nghak thar Mendy an la lut zui a nih chuan Kepa hi a talbuai zui ngei rinna a lian hle a, a dinhmun a hloh zui mai ringtu an tam hle. Lampard chuan chetsual ching tak Kepa hi inrintawkna a neih leh theih nan an puih tur thu sawiin, a tawng thlamuan ve hlauh thung.

Tottenham chak chiang
An khelh hmasak berah Everton hneh lova tlawm nghal ringawt Tottenham chuan khualmualah Southampton an hmachhawn a, Son goal li leh Kane goal khat thun hmangin 5-2 ngawtin hnehna an chang a, an insiamtha nghal.

Tottenham hian goal an chhuah hmas leh zet a, Saints tan minute 32-naah Danny Ings chuan hmahruaina goa a thun. He goal hi Son Heung-Min chuan minute 45+2-ah a sut a, chawlhlawk hnu lamah goal thum thun belh zui lehin goal li ngawt a thun a. Minute 82-naah goal li siamchhuaktu Kane chuan goal khat a thun ve bawk. Tottenham laka hmahruaina goal thuntu Ings chuan minute 90-naah penalty atangin Southampton goal hnihna a thun belh ve leh bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy