Chak thei lo Bayern Munich hmahruaina derthawng zel

An record kawl lai belhchhaha a zawna Bundesliga title 11 lak tlin tum mek Bayern Munich kechheh a fuh lo tluang zel a, Inrinni zan khan Borussia Monchengladbach mualah 2-3-a tlawm lehin, league table-a anmahni hnaihbertu 1. FC Union Berlin lakah he thu buatsaih lai thleng hian point khat chauhin an sang tawh a, nizan inkhel result tarlan hman loh pakhata an mikhual FC Schalke 04 laka an chak phei chuan Union hian Bayern lehpelin league hma an hruai tawh ang!
German champion Bayern hi Monchengladbach laka an match hnuhnung vawingaah an tlawm fai vek a, Bavarians tan Gladbach hi mangchhia an ni ringawt!
Pathianni zan German Bundesliga inkhel pakhatah hian tan atanga minute riatna lekah Bayern defender Dayot Upamecano chu hnawhchhuah niin, hei hian mikhual team tan a tiphet a, minute 13-na lekah Lars Stindl chuan Gladbach hmahruaina goal pawh a thun ta reng a ni.
Home team goal hnihna hi an goal hnih dang siamchhuaktu attacking midfielder Jonas Hofmann-a tihluh niin, Marcus Thuram chuan an goal thumna a thawh thung.
Bayern Munich tan Eric Maxim Choupo-Moting chuan chawlhlawk hmain an siphurh a sut zet a; goal thum an chhuah hnu hun pekbelhah Mathys Tel chuan mikhual goal hnihna tilut ve bawk mah se defending champion tlawm tur a chhan zo lo a, Bayern chak lo tluang lai a kal tluang!
He thu buatsaih lai thlenga pahnihna luahtu Union Berlin hi tun season German top-flight team zinga mak taka kal tluang mek an ni a, a mawngphah team laka hnehna an chang a nih chuan Bayern chungah an awm thei hial tawh dawn a ni!
Nizan result tarlan hman loh dangah pathumna Borussia Dortmund pawhin a mawngphah chung chiah luahtu Hertha Berlin laka hnehna an chan chuan Bayern hi point-ah an nihrual thei tawh dawn!
Bayern coach Julian Nagelsmann chuan a tir lam minute sarih chhungin an khel tha a, goal thun theihna hun remchang pawh vawihnih thum hmuin, sihnih faia hmahruai thei dinhmuna an din hman hial thu leh kumina an bul tan fuh ber tum a la nih hial thu a sawi a, chutih laiin red card-in an dinhmun a tiphet a, goal an chhuah zui bawk a, chuti chungin an siphurh an sut thei tih a sawi.
“A tlem zawk ni chungin second half-ah team tha zawk niin inkhel kan thunun thei a, mahse, si kan han chhuah zui leh kha chu kirleh a harsa zo ta a ni,” a ti.