Anfield ah Real Madrid

Zanin zanlai lai 1:30 atangin UEFA champions league last 16 khelh chhunzawm a ni leh dawn a. Champion lai Real Madrid chu Liverpool hmachhawn turin Anfield-ah an lenglut dawn. Premier League club ropui Liverpool hian season liam ta UCL final-a an hneh loh Real Madrid hi Anfield-ah hneh ngei an lo tum dawn a, inkhel hmuhnawm tak a nih a rinawm.
Liverpool leh Real Madrid hi tun hma lamin vawi kua an intum tawh a, vawi nga chak zawka tang Real Madrid an chungnung zawk. Liverpool hian Champions League-a club hlawhtling ber Real Madrid hi vawi thum an hneh tawh a. Vawi khat dang chu an inhnehtawk. Real Madrid hian England-ah record an nei tha lo viau a, Mimuala English club an hmachhawn hnuhnung vawi sarihah vawi khat chiah an chak. Hetihlai hian Anfield-a an luh chilh tur Liverpool hi inkhel pawimawh tak; Champions League final-ah an hneh zawn tawh thung.
English club zingah Europe a hlawhtling ber Liverpool hi season kal mekah an khel tha lo viau a, beisei an phak lo. EPL-ah vawi 22 khelin point 35 chauh an hmu a, pariatnaah an awm mek. EPL an khelh hnuhnung berah an khel tha viau thung a, EPL-ah pathumnaa awm mek Newcastle United chu St-James Park-ah si hnih faiin an hneh. Hnehna chang hlimhlawl an nih vangin an mikhual Real Madrid hneh turin inrintawkna sang tak an nei ang.
La Liga leh champions League-a champion lai Real Madrid pawh season kal mekah beisei angin an khel tha bik lo. La Liga-ah vawi 22 khel tawhin, point 51 an hmu a, Barcelona aiin point 8 ngawtin an hniam zawk a, pahnihnaah an awm mek. Champions League hi an ropuina a nih miau vangin an khingpui turte tan huphurh loh theih an ni lova, UCL hi an intihtatu em vangin Anfield-a ngei ngampa zetin Real Madrid hi an inlan leh ngei tura ngaih a ni.
Zanin vek hian Eintracht Frankfurt chuan Serie A club lian Napoli an mikhual ve bawk ang.
Champions League last 16 hi nilai zan, zanlai dar 1:30-ah khelh chhun-zawm a ni ang a. Premier League champion Manchester City chuan Mimualah RB Leipzig an hmachhawn ang a. Serie A club lian Inter Milan chuan San Siro-ah FC Porto an mikhual ve bawk ang.