PSG chakpuitu Messi

Pathianni zan khan French Ligue 1 champion Paris St-Germain chuan Parc des Princes-ah Lille an mikhual a. Goal sarih zet luhna inkhel hmuhnawm takah hun pek belha Lionel Messi goal thun hmangin mualneitu PSG an chak hram. Inelna hrang hrangah vawi thum ngawt an tlawm zawn hnuin PSG hian hnehna an chang ve leh ta nge nge.
Parc des Princes-a an mikhual Lille lakah PSG hian tha zetin bul an tan a, minute 17 chhung lekin goal hnih an thun hman der tawh. Inkhel tan atanga minute 11-na lekah Kylian Mbappe chuan Neymar ball pek dawngin, defender pahnih inkarah tha zetin a khalh tlang a, awlsam taka pet goal in hmahruaina goal a thun. Mbappe goal thun atanga minute ruk hnu lekah PSG hian an mikhualte an nawr tlang leh nghal a, minute 17-naah Vatinha siamsak tha tak chu Neymar chuan awlsam takin a pet goal a, an goal hnihna a thun.
Champion lai lakah goal chhuah zawn mahse Lille an buai phah lova, huaisen takin an khingpuite an nawr let. Minute 24-naah Bafodé Diakité chuan tha zeta tauh goal in an si phurh a sut then. Minute 24 chhung lekin goal thum ngawt lut mahse chawlhlawk hmain goal dang a luh belh thei tawh lo.
Chawlhlawk hnu lamah mikhual team Lille in bul an tan tha a, goal thum ngawt an thun zawn. Minute 58-naah Jonathan David chuan penalty atanga goal thunin an si phurh a sut zo phawt a. Minute 69-naah Jonathan Bamba chuan near post ah tha zeta pet goal zui lehin, hma an hruai letna goal a thun. An mikhual lakah hnufual zawk an nih hnuin khelh thum chhung tlawm zawnah PSG lakah rinhlehlna lian tak a awm thar leh a, an mualah an chak zo lo leh nge nge tura ngaih an ni hman.
An hmahruaina sawh nghet tura chak mamawh PSG hian an si phurh sut tum viau mah se goal an thun thei lawk lo. Tha thlah lova khingpuite an nawr char rah an seng a, minute 87-naah goal hmahruai thuntu Mbappe chuan PSG goal thumna thunin an si phurh a sut. An si phurh an sut hnuin hun pek belhah an vannei zui leh. Minute 90+5-ah Lionel Messi chuan pui zetin free kick a chhuih goal a, hma an hruai nawn lehna goal a thun a. Messi goal roopui hi chakpui nan an hmang a, PSG in point thum hlu tak an hlawhchhuak.
French Ligue 1 season kal mekah PSG hian vawi 24 khelin point 57 an hmu a, point ngain hma an hruai fal mek. Pathianni zanah harsa taka an hneh Lille khan vawi 24 khelin point 41 an hmu a, parukna an ni mek thung.