Anthurium Festival neih zel theih nan Horti minister-in hma lakpui

Anthurium Festival tih tawp tum nia sawi chu neih zawm zel a nih theih nan Horticulture minister chuan hma a lakpui tih anthurium chingtu pawlte a hrilh.
Nilainia ZAGCS (Zo Anthurium Growers Cooperative Society Ltd.) Collection Centre Ramhlun North ami a tlawhnaah Horticulture minister Prof. Lalnilawma chuan, an department-in hlawhtling taka anthurium chin leh market a nih theihna tura hma a lakpuinaah lawmawm a tih thu sawiin, an thawnchhuah tur sawngbawlna hmun a hmuh atangaa ZAGCS-in hma a lak nasat zia leh anthurium hmanga Mizoram an tih hmingthatnaah lawmawm a tih thu a sawi.
ZAGCS-in harsatna tawh neuh neuh an thlen chu a theih ang anga hma lakpui an nih tur thu a hrilh a. Anthurium chu Mizoten tourism kan promote-na pakhat a nih avangin Anthurium Festival neih zel theih nise, tia ZAGCS rawtna pawh hma lakpui an ni tih a hrilh.
ZAGCS hruaitute sawi danin, kum 2001 khan member 24-in Horticulture department puihna in Mizoramah anthurium an ching tan a, society – ZAGCS hi kum 2016-a din niin, tunah member 150 an ni. Aizawl bakah Lunglei, Serchhip leh Kolasib district-ah an member-te hi an awm a ni.
Anthurium hi Mizoramah a that duh em avang leh India ram hmun danga an neih ve loh avangin a market-ah buaina a awm loa, kartin Rs. 40000 vel Delhi Phul Mandi-ah an thawn chhuah ziah bakah tualchhung market-ah tam tham tak an hralhchhuak reng tih an sawi a. Anthurium chu Mizoram tualto ni lo mah se, Mizorama thar hi a quality duhthusam a nih vangte, a vase life a that em avang leh Mizoram atanga kartin thawnchhuah awmchhun a nih avangin hei aia zau leh uar zawka hmalakna tlak a ni tihte sawiho a ni.