AR awmna tur hawng turin Amit Shah rawn kal dawn: CM

Zokhawsanga Assam Rifles te awmna tur leh Lammual rama Mizoram sorkar complex din tur lungphum phum turin union home minister Amit Shah a rawn zin dawn, chief minister Zoramthanga’n a ti.
Thawhlehni zan khan budget session-ah a demand sawihonaah a hmawrbawktuah tangin chief minister hian Lammual ram chungchang hi a sawi a, March ni 17-ah Amit Shah a rawn zin dawn nia sawiin, a complex pui leh Laldenga Centre lungphum phum turin a rawn zin dawn tih a sawi.
Nikuma Delhi-a a zinin hemi atan vek hian November thlaa rawn zin turin Amit Shah hi a sawm tih a sawi a, mahse Gujarat inthlanah an campaign a, chumi hnuah Parliament thutkhawm a awm leh nghal a, a rem ta lo tih te a sawi. Chumi hnuah an inbe leh a, March ni 17-a rawn zin a tum ta tih a sawi. Chutih rual chuan rokhawlhna te pawh awm thei a nih thu a sawi a, “Amaherawhchu, Pathian thu thu ni sela,” a ti.
SEDP-ah cheng nuai 3 pek an nei tawh em tih zawhna chhangin chief minister hian, vawkvulhtu chhungkaw 220 hnenah cheng nuai 3 pek a ni tawh tih a sawi a, mau chungchangah an phun hnem tawh a, mahse a la puitling lo nia a sawi bakah “Delhi lam kan phur angin an la phur lo a, kan la convince lo,” a ti.
Horticulture department hnuaiah hmasawnna a nasa niina sawi a, tomato, grape, lakhuihthei, dragon fruit lamahte hmasawnna a nasa niin a sawi.
Health Carse Scheme chungchang a sawi a, “Mipui tan a tha si a, tlin lo chung chungin kan ti a ni,” tiin, India sorkarin cheng vaibelchhe 720 a rulhsak vek dawn niin a sawi a, cheng vaibelchhe 280 vel chu Mizoramin a tum ve dawn niin a sawi a, hma a sawn thuai dawn niin a sawi.
Lengpui Aiport chungchang a sawi a, siamthat a nih vangin pindan thiah te a awm a, trolley dahna tur te pawh a awm mumal loh lai a awm niin a sawi a, chumi chhung chuan contractor hnuaia thawkte leh mi dangin trolley chu an lo hmang nia sawiin, “Kan hriat loh chhung khan an lo tichhe teuh mai a,” a ti. Contractor hi a thar 100 vel an leitir dawn tih a sawi.
Mizoram budget-a sum neih turah state matching share atana dah tur a tam tih a sawi a, chumi hmanga sum hailuh an tum tih sawiin, tu pawh sorkar se chutiang chuan ti se a duh thu a sawi.