AR-in minister an tih din chhan hi puangzar turin kan phut a ni – MPCC president

Minister zin haw lam Assam Rifles-in tidinga an tibuai chu an dem a, an tih din chhan hi mipui hriata puangzar turin an phut tih Congress president Lal Thanzara chuan a sawi.
Zirtawpnia Congress Bhavan-a inkhawmah Lal Thanzara chuan, minister Pu F Rodingliana’n a department hnathawh enkuala a zin Assam Rifles-in hmun thuma tidingin an tibuai a. National flag tar, pilot nei leh amah zuitu nei bawk chung a, mipui thlan lal zah lo taka check tuma an tibuai chu a lungchhiat thlakin an dem tih a sawi.
“Sawrkar hian he thil thleng hi rang takin a chhan leh a vang chhuichhuak se, hma la se kan duh. Assam Rifles hotute pawh hetia minister an tibuai hi hekna leh thil dang a awm a nih chuan mipui hriatah puangzar turin kan phut a ni,” a ti.
Chanchinbua lo lang, chief minister-in RTI chhanna a en duh vangin a zawttu in a chhanna a hunah a hmu lo tih sawi a nih thu Lal Thanzara hian sawiin, RTI chhanna chu file-a inziak angin official-ten an chhang mai thin a, tun sawrkarah chuan minister-ten RTI chhanna an duh anga an tidanglam thin chu a pawi a, mipuiin thudik an hriat loh phah thei tih a sawi a ni.