AR insawn chhuak tur hi…

Tunhnaia Assam Rifles ten an insawnna tur Zokhawsang lama bungrua thenkhat thiar chhuah an duh avanga traffic lama harsatna an tawh loh nana traffic lam thuneitute an hriattirna leh ngenna lehkha putchhuak chuan chanchin mak tak tak a hring chhuak a, politics thila inbeihna a hring chhuak titih nghe nghe a nih kha.
Tunah hian Zokhawsang hi sipai company khat leh an family ten an luah mek tawh a, an inhmakhua ve hret hret tih chu a hriat mai awm e.
Thil chiang tak pakhat awm chu, Assam Rifles te hi insawnchhuak tura tih an nih tawh avangin an awmna tur hmun pawh Zokhawsang tihfel vek tawh a ni, tih hi. Chutih rual chuan Ministry of Home Affairs lamin, “Khai le, insuan chhuak tawh rawh u le” tia movement order a rawn pek hunah ‘an insawn ta’ a tih theih chauh dawn a. Sipai insuan chhuak tura MHA lamin thupek an rawn chhuah hunah meuh chuan thupek ri hi a ring dawn a, hai rual a ni lovang.
MHA lam thupek hriat a nih hma hi chuan motor inzui duah duah khawpin bungrua lo phur kuar vel pawh ni se, ‘AR an chhuak ta’ tih mai chi a la ni lo tihna a ni ber awm e.
Chutih rual chuan, sipaite hi insawn chhuak thuai tura kan duh a nih chuan, an insawnchhuahna tur hmuna thil peihfel loh la awmte enge ni tia a chinfel dan tur ngaihven ve vat vat hi kan tih ve tur niawm tak a ni.
Hetih lai hian, sipai ram luah chin ni sia LSC lo nei tlatte kha, state rorelna sang berin ‘cancel tur’ tih dan a siam fel tawh a nih si chuan, LSC holder-te hnena an LSC ‘rawn surrender rawh u’ tia ngen zui hi enge a tulna? tih ngaihdan a awm thei a. Tun hnaiah, NGO Coordination Committee pawhin AR ram chhunga mimal LSC te chu a rang thei ang bera cancell turin sawrkar an ngen a nih kha. A nihna takah chuan, sawrkar lamin ram awm fel sa chhungah LSC a pe chhuak a, ram inpekthuah a nih avangin dan kalh a ni a, sipai ram luah chhung la ni sia LSC lo neih kha dan mit atang pawhin ‘cancell’ phu hliah hliah chu a ni sa tawh hrim hrim a ni.