AR leh sipai beihpui thlaknaah Kuki hel nia hriat that
Manipur-a Churachandpur district, Molphei leh Songkong khaw inkara Assam Rifles nena an inkahnaah Thawhlehni khan Kuki hel pawl khap zinga mi, United Kuki National Army (UKNA)-a mi ni ngeia hriat kah hlum a ni tih officer-ten Nilaini khan an sawi.
Thi hi Churachandpur district-a mi Lenminsang Haokip a ni tih hriat a ni.
Churachandpur police thuchhuah chuan, “Vawiin khan Assam Rifles atangin thu dawn a ni a, June 16, 2026 khan Molphei leh Songkong khaw inkarah Assam Rifles leh sipai tang dunin firfiak nia rinhlelhte an beihnaah firfiak nia rinhlelh pakhat a thi a, AK-47 rifle pakhat, magazine, a mu, puak thei thil leh thubuai siamsak thei thil dangte chu a hmunah hian an hmu chhuak ,” an ti.
Thuchhuah chuan thubuai ziah luh a ni a, chhui chian belh zel a nih thu tar lan a ni.
He thil hi venhim hna thawktuten UKNA awmna hmun an dawn bawhzuia beihpui an thlaknaa thleng a ni.
“Venhim hna thawktuten an hmun sawi hi an pan laiin UKNA mi nia rin silai keng thenkhat, tanhmun siamte an lo kap a, an chhang let nghal a, nasa takin an inkap tawn a, beihpui thlaknaah hian security team atangin thi leh hliam an awm lo a ni,” tiin police hotu lian pakhat chuan a sawi.
Venhim hna thawktu dang dang dah belh an ni a, ralthuam kengte zawn leh he bial himna atana hma lak mek a ni.
Hetihlai hian Songkong khuaa thuneitute chuan thuchhuah siamin Indian Army-te chuan June 16, 2026 tlai dar 02:00 vel khan Songkong khua chu drone leh bomb hmangin an bei niin an sawi.
“Pawisawi lo pakhat, Lenkhogin Haokip fapa, Lenminsang Haokip chu sipai kutah a thi a, a thawmhnaw chu sipai uniform-in an thlak a, tun thlengin a awmna hi hriat a la ni lo,” tiin thuchhuahah chuan an tar lang.
Kuki MLA Letzamang Haokip-a pawhin thuchhuah siamin Lenminsang thah chu a dem thu a sawi a. “Hmutute chuan kah hlum a nih hnuah a thawmhnaw hlihsak a nih thu leh a ruang chu venhim hna thawktuten an laksak niin an sawi a, a thih hnuah pawh he thil thleng hi beihpui thlakna lem anga tar lan tumna a awm niin an sawi bawk a, heng puhnate hi a dik tih hmuhchhuah a nih chuan thuneihna hman sualna nasa tak a ni ang a, dan bawhchhiatna nasa tak a ni ang. Hei hi pawm theih loh a ni a, heng puhnate hi a pawi hle a, a rang thei ang bera chhui chian a ngai a ni,” a ti.
Letzamang-a chuan a rang thei ang bera ruang chu an chhungte kutah hlan a phut bawk.